മോദിക്കുള്ള മെലഡി ചോക്ലേറ്റ് പരാമർശം: ഇറ്റാലിയൻ പ്രധാനമന്ത്രിയെ പിന്തുണച്ച് ശിവസേന
ന്യൂഡൽഹി: ഹൈദരാബാദിൽ കോൺഗ്രസ് നടത്തിയ ഭാരത് ഉച്ചകോടിക്കിടെ ഇറ്റാലിയൻ രാഷ്ട്രീയ നേതാവ് ജിയാകോമോ ഫിലിബെക്ക് നടത്തിയ പ്രസംഗം വലിയ വിവാദങ്ങൾക്കാണ് വഴിതെളിച്ചത്. ഇദ്ദേഹത്തെ പിന്തുണച്ച് ശിവസേന ഉദ്ധവ് താക്കറെ വിഭാഗം നേതാവ് സഞ്ജയ് റാവുത്ത് രംഗത്തെത്തിയിരിക്കുന്നു. ഇന്ത്യൻ ജനാധിപത്യത്തെ വിദേശി വിമർശിച്ച വിഷയത്തിൽ ബിജെപി ഉൾപ്പെടെയുള്ള കക്ഷികൾ കോൺഗ്രസിനെതിരെ ശക്തമായ പ്രതിഷേധം ഉയർത്തുന്നതിനിടയിലാണ് സഞ്ജയ് റാവുത്ത് ഇത്തരമൊരു നിലപാടുമായി എത്തിയിരിക്കുന്നത്.
‘‘ഇറ്റാലിയൻ പ്രധാനമന്ത്രിക്ക് മെലഡി ചോക്ലേറ്റുകൾ സമ്മാനിക്കാൻ പ്രധാനമന്ത്രി നരേന്ദ്ര മോദിക്ക് സാധിക്കുമെങ്കിൽ, പിന്നീട് എന്തുകൊണ്ട് ഒരു ഇറ്റാലിയൻ രാഷ്ട്രീയപ്രവർത്തകന് ഇവിടെയെത്തി നമ്മുടെ രാജ്യത്തെക്കുറിച്ച് സംസാരിച്ചുകൂടാ?’’ എന്ന് ഡൽഹിയിൽ മാധ്യമങ്ങളോട് സംസാരിക്കവേ സഞ്ജയ് റാവുത്ത് ചോദിച്ചു. പാർട്ടി ഓഫ് യൂറോപ്യൻ സോഷ്യലിസ്റ്റുകളുടെ സെക്രട്ടറി ജനറലായ ജിയാകോമോ ഫിലിബെക്ക്, ഉച്ചകോടിക്കിടയിൽ ‘വോട്ട് കള്ളാ, സ്ഥാനമൊഴിയൂ’ എന്ന മുദ്രാവാക്യം മുഴക്കിയത് ഏറെ ചർച്ചകൾക്ക് വഴിവെച്ചിരുന്നു.
