വീണാ ജോർജിന്റെ ഗൺമാന്റെ മൊഴിമാറ്റം: പ്രതിസന്ധിയിൽ മന്ത്രി
കണ്ണൂർ ∙ വീണാ ജോർജിനെ കെഎസ്‌യു പ്രവർത്തകർ ആക്രമിച്ചിട്ടില്ലെന്ന് വ്യക്തമാക്കുന്ന എസ്ഐടി റിപ്പോർട്ടിലെ ഏറ്റവും നിർണ്ണായകമായ മൊഴി അവരുടെ ഗൺമാനായ എം.എസ്. അഭിലാഷിന്റേതാണ്. ഫെബ്രുവരി 25-ന് കണ്ണൂർ റെയിൽവേ സ്റ്റേഷനിൽ നടന്ന പ്രതിഷേധവുമായി ബന്ധപ്പെട്ട് വീണാ ജോർജിനെ അപായപ്പെടുത്താൻ സമരക്കാർ ആയുധങ്ങളുമായി ശ്രമിച്ചുവെന്നായിരുന്നു ആദ്യം രജിസ്റ്റർ ചെയ്ത എഫ്ഐആറിലെ ആരോപണം. കരിങ്കൊടി കാണിച്ചും മുദ്രാവാക്യം വിളിച്ചും പ്രകോപനപരമായി മുന്നോട്ട് വന്ന കെഎസ്‌യു പ്രവർത്തകർ, ‘കൊല്ലെടാ’ എന്ന് ആക്രോശിച്ചുകൊണ്ട് വീണയുടെ കഴുത്തിൽ ആയുധം കൊണ്ട് മുറിവേൽപ്പിച്ചെന്നായിരുന്നു ഗൺമാൻ അഭിലാഷ് അന്ന് നൽകിയ പരാതിയിലുണ്ടായിരുന്നത്.
ഈ സംഭവത്തെത്തുടർന്ന് കെഎസ്‌യു കണ്ണൂർ ജില്ലാ പ്രസിഡന്റ് എം.സി. അതുൽ, വി.വി. അക്ഷയ്, ബിതുൽ ബാലൻ, സി.എച്ച്. മുബാസ്, അഹമ്മദ് യാസിൻ എന്നിവർക്ക് 16 ദിവസത്തോളം റിമാൻഡിൽ കഴിയേണ്ടി വന്നിരുന്നു. തുടർന്ന് യുഡിഎഫ് സർക്കാർ അധികാരത്തിൽ വന്നതിന് പിന്നാലെ ടി.ഒ. മോഹനൻ എംഎൽഎ സമർപ്പിച്ച പരാതിയുടെ അടിസ്ഥാനത്തിൽ പ്രത്യേക അന്വേഷണ സംഘം (എസ്ഐടി) രൂപീകരിച്ച് കേസ് വീണ്ടും പരിശോധിക്കുകയായിരുന്നു. ആക്രമണസമയത്ത് ആരെങ്കിലും ആയുധം ഉപയോഗിക്കുന്നത് താൻ കണ്ടിട്ടില്ലെന്നും, വീണാ ജോർജിന്റെ നിർദ്ദേശപ്രകാരമാണ് അങ്ങനെയൊരു പരാതി നൽകിയതെന്നും അഭിലാഷ് ഇപ്പോൾ എസ്ഐടിക്ക് മൊഴി നൽകിയിട്ടുണ്ട്. ഈ വെളിപ്പെടുത്തൽ വീണയ്ക്ക് കനത്ത തിരിച്ചടിയായിരിക്കുകയാണ്. തനിക്ക് നേരെ ആക്രമണം നടന്നത് കണ്ടില്ലെന്നും എന്നാൽ തന്റെ ഗൺമാൻ അത് കണ്ടിട്ടുണ്ടെന്നുമാണ് എസ്ഐടിയോട് വീണാ ജോർജ് നേരത്തെ വിശദീകരിച്ചിരുന്നത്.
