മുഖ്യമന്ത്രിയുടെ നേതൃത്വത്തിൽ ദുരൂഹ ഇടപാടുകൾ: സി.പി.ഐ
തിരുവനന്തപുരം: സംസ്ഥാനത്തെ വൈദ്യുതി പ്രതിസന്ധിയെ മറയാക്കി വൈദ്യുതി വാങ്ങുന്നതിനായി മുഖ്യമന്ത്രിയുടെ നേതൃത്വത്തിൽ സംശയാസ്പദമായ ഇടപാടുകൾ നടക്കുന്നതായി സി.പി.ഐ ആരോപിച്ചു. കരാർ നടപടികളിൽ നിയമവിരുദ്ധമായ ഇടപെടലുകൾ നടന്നിട്ടുണ്ടോ എന്നും, ഒരു സ്വകാര്യ കമ്പനിക്ക് വഴിവിട്ട സഹായം ലഭ്യമാക്കാൻ ശ്രമം നടക്കുന്നുണ്ടോ എന്നതിനെക്കുറിച്ച് നിഷ്പക്ഷമായ അന്വേഷണം അനിവാര്യമാണെന്ന് പാർട്ടി വ്യക്തമാക്കി.
വൈദ്യുതി മേഖലയിലെ ഇപ്പോഴത്തെ സംഭവവികാസങ്ങൾ അതീവ ഗൗരവകരവും ജനങ്ങളിൽ ആശങ്ക ഉളവാക്കുന്നതുമാണ്. കേരളത്തിന്റെ വൈദ്യുതി ആവശ്യം ഒരു സ്വകാര്യ സ്ഥാപനത്തിന്റെ ലാഭമുണ്ടാക്കാനുള്ള വഴിയായി മാറ്റിയതിൽ മുഖ്യമന്ത്രിയുടെ പങ്ക് ദുരൂഹമാണ്. ഇത്തരമൊരു പ്രതിസന്ധി ഘട്ടം ചിലരുടെ സാമ്പത്തിക താൽപ്പര്യങ്ങൾക്കായി ഉപയോഗിക്കുന്നത് അംഗീകരിക്കാനാവില്ല. പൊതുഖജനാവിലെ പണം വിനിയോഗിക്കുന്ന ഓരോ തീരുമാനത്തിലും സർക്കാരിന് ജനങ്ങളോട് ഉത്തരവാദിത്തമുണ്ട്. പൊതുമേഖലയിൽ നിന്ന് കുറഞ്ഞ നിരക്കിൽ വൈദ്യുതി ലഭിക്കാൻ സാധ്യതയുള്ളപ്പോൾ, സാമ്പത്തിക ബാധ്യത വർദ്ധിപ്പിക്കുന്ന മറ്റ് വഴികൾ തേടാൻ മുഖ്യമന്ത്രി താല്പര്യം കാണിക്കുന്നത് എന്തിനാണെന്ന് വ്യക്തമല്ല.
ജി.എൻ.എ കരാറുമായി ബന്ധപ്പെട്ട മുഴുവൻ രേഖകളും കെ.എസ്.ഇ.ബിയുടെ ആഭ്യന്തര വിലയിരുത്തലുകളും, ഇതുമായി ബന്ധപ്പെട്ട് ഉദ്യോഗസ്ഥർ രേഖപ്പെടുത്തിയ വിയോജനക്കുറിപ്പുകളും ഉൾപ്പെടെയുള്ള വിവരങ്ങൾ സുതാര്യത ഉറപ്പാക്കാനായി ജനങ്ങൾക്ക് മുന്നിൽ വെളിപ്പെടുത്തണമെന്നും സി.പി.ഐ സംസ്ഥാന സെക്രട്ടേറിയറ്റ് ആവശ്യപ്പെട്ടു.
