ഉദ്ഘാടനം കഴിഞ്ഞിട്ടും അടഞ്ഞു കിടക്കുന്ന സബ് സെന്റർ; കുട്ടികൾക്കുള്ള പോളിയോ വാക്സീൻ മൃഗാശുപത്രിയിൽ

പാലക്കാട് ജില്ലയിലെ മണ്ണാർക്കാട്, കുമരംപുത്തൂർ ചങ്ങലീരി രണ്ടാം മൈലിൽ കുട്ടികൾക്ക് പോളിയോ വാക്സിൻ നൽകിയതുമായി ബന്ധപ്പെട്ട് രൂക്ഷമായ തർക്കവും സംഘർഷാവസ്ഥയും ഉടലെടുത്തു. മൃഗാശുപത്രിയിൽ വാക്സിനേഷൻ കേന്ദ്രം ക്രമീകരിച്ചതിനെതിരെ നാട്ടുകാർ പ്രതിഷേധവുമായി എത്തിയതാണ് സംഘർഷത്തിൽ കലാശിച്ചത്. ഒടുവിൽ പ്രതിഷേധം ശക്തമായതോടെ വാക്സിനേഷൻ കേന്ദ്രം സമീപത്തെ അങ്കണവാടിയിലേക്ക് മാറ്റി സ്ഥാപിക്കുകയായിരുന്നു.
ചൊവ്വാഴ്ച രാവിലെയാണ് ചങ്ങലീരി രണ്ടാം മൈലിലെ മൃഗസംരക്ഷണ കേന്ദ്രത്തിൽ പോളിയോ പ്രതിരോധ തുള്ളിമരുന്ന് വിതരണം ആരംഭിച്ചത്. ഏഴ് കുട്ടികൾക്ക് ഇവിടെ നിന്ന് മരുന്ന് നൽകിക്കഴിഞ്ഞപ്പോഴാണ് സംഭവം വിവാദമായത്. മൃഗാശുപത്രിയിൽ വെച്ച് വാക്സിൻ നൽകുന്നതിനെതിരെ പഞ്ചായത്തംഗം ഷാഫി ചങ്ങലീരിയുടെ നേതൃത്വത്തിൽ നാട്ടുകാർ സംഘടിച്ചെത്തി ശക്തമായ എതിർപ്പറിയിച്ചു.
തുടർന്ന് സ്ഥലത്തെത്തിയ പഞ്ചായത്ത് സ്ഥിരം സമിതി അധ്യക്ഷ ജംഷീല, പറമ്പുള്ളി വാർഡംഗം വി. വിനീത, സിപിഎം പ്രവർത്തകർ എന്നിവർ, മുമ്പും ഇതേ സ്ഥലത്ത് വാക്സിനേഷൻ നടത്തിയിട്ടുണ്ടെന്നും അവിടെത്തന്നെ അത് തുടരണമെന്നും വാദിച്ചു. ഇതോടെ നാട്ടുകാരും ജനപ്രതിനിധികളും തമ്മിൽ വാഗ്വാദം രൂക്ഷമായി. സ്ഥിതിഗതികൾ വഷളായതോടെ, പ്രതിഷേധക്കാരുടെ ആവശ്യം അംഗീകരിച്ചുകൊണ്ട് വാക്സിനേഷൻ കേന്ദ്രം പറമ്പുള്ളിയിലെ അങ്കണവാടിയിലേക്ക് മാറ്റാൻ അധികൃതർ നിർബന്ധിതരാകുകയായിരുന്നു.




