ദേശീയപാത വീതി 60-ൽ നിന്ന് 45 മീറ്ററാക്കി കുറച്ചു; സർവീസ് റോഡുകളുടെ നിർമാണം അവതാളത്തിൽ
ആലപ്പുഴയിലെ ദേശീയപാതയോടു ചേർന്നുള്ള സർവീസ് റോഡുകളിലൂടെ യാത്ര ചെയ്യുന്നവർക്ക് അനുഭവപ്പെടുന്ന പ്രധാന തലവേദന ഗതാഗതക്കുരുക്കാണ്. ബസുകൾ യാത്രക്കാരെ ഇറക്കാനായി അല്പനേരം നിർത്തിയിടുന്നതും എതിർദിശയിൽനിന്ന് വാഹനങ്ങൾ കടന്നുവരുന്നതുമൊക്കെ ഇവിടെ നിത്യസംഭവമായ ഗതാഗതസ്തംഭനങ്ങൾക്ക് കാരണമാകുന്നു. നിയമപരമായ മാനദണ്ഡങ്ങൾ പ്രകാരം ഏഴ് മീറ്റർ വീതി സർവീസ് റോഡുകൾക്ക് അത്യാവശ്യമാണ്; ഇതിൽ ഒന്നര മീറ്റർ വീതിയിൽ ഓടയും മറ്റൊരു ഒന്നര മീറ്റർ നടപ്പാതയ്ക്കുമായി നീക്കിവെക്കണം. എന്നാൽ മിക്ക സ്ഥലങ്ങളിലും ഓടയ്ക്കു മുകളിലൂടെ തന്നെയാണ് നടപ്പാത നിർമിച്ചിരിക്കുന്നത്. മാത്രമല്ല, കാൽനടക്കാർക്കുള്ള ഈ വഴി പലപ്പോഴും വാഹനങ്ങളുടെ പാർക്കിങ് കേന്ദ്രങ്ങളായി മാറുന്നു. സർവീസ് റോഡിലൂടെയുള്ള വാഹനങ്ങളുടെ അമിത വേഗതയിലുള്ള ഓവർടേക്കിങ്ങും ഗതാഗതത്തെ ദുഷ്കരമാക്കുന്നു.
ജില്ലയിലെ പല ഭാഗങ്ങളിലും നിശ്ചിത ഏഴര മീറ്റർ വീതി സർവീസ് റോഡുകൾക്ക് ലഭിച്ചിട്ടില്ല. മതിയായ വീതിയോ അടിസ്ഥാന സൗകര്യങ്ങളോ ഇല്ലാത്ത ഇത്തരം റോഡുകളിലൂടെ എങ്ങനെ സുഗമമായി യാത്ര ചെയ്യുമെന്നത് ജനങ്ങളുടെ പ്രധാന ചോദ്യമാണ്. വാസ്തവത്തിൽ, അറുപത് മീറ്റർ വീതിയിൽ നിശ്ചയിച്ചിരുന്ന ദേശീയപാത പിന്നീട് 45 മീറ്ററായി വെട്ടിക്കുറച്ചതാണ് സർവീസ് റോഡുകളുടെ നിർമാണത്തെ ദോഷകരമായി ബാധിച്ചത്. വീതി കുറച്ചതിനെത്തുടർന്ന് പല കാര്യങ്ങളിലും വിട്ടുവീഴ്ചകൾ ചെയ്യേണ്ടി വന്നതും പ്രതിസന്ധി സൃഷ്ടിച്ചു. ബസ് ബേകൾക്കായി കൃത്യമായ സ്ഥലം കണ്ടെത്താൻ കഴിയാത്തതാണ് നിലവിലെ പ്രധാന തടസ്സം. സർവീസ് റോഡുകളിൽ തന്നെ ബസ് സ്റ്റോപ്പുകൾ വരുന്നതോടെ തിരക്ക് ഇരട്ടിയാകുന്നു. ബസ് നിർത്തുമ്പോൾ വീതി കുറഞ്ഞ ഭാഗങ്ങളിലൂടെ മറ്റ് വാഹനങ്ങൾക്ക് കടന്നുപോകാൻ കഴിയാത്ത സ്ഥിതിയാണ് ഇപ്പോഴുള്ളത്.
ദേശീയപാതയുടെ സർവീസ് റോഡുകളിൽ നിലനിൽക്കുന്ന ഗുരുതരമായ സുരക്ഷാ വീഴ്ചകളെക്കുറിച്ച് നാറ്റ്പാക് (NATPAC) മുൻപ് തന്നെ മുന്നറിയിപ്പ് നൽകിയിരുന്നു. പ്രത്യേകിച്ച് അടിപ്പാതകളുടെ രൂപകല്പനയിൽ വലിയ പിഴവുകളുണ്ട്; ഡ്രൈവർമാർക്ക് ദൂരക്കാഴ്ച ലഭിക്കാത്ത വിധമാണ് ഇവ ഡിസൈൻ ചെയ്തിരിക്കുന്നത്. അടിപ്പാതയിൽനിന്ന് പ്രധാന സർവീസ് റോഡിലേക്ക് പ്രവേശിക്കുന്ന വാഹനങ്ങൾ മറ്റ് ഡ്രൈവർമാരുടെ ശ്രദ്ധയിൽ പെടാൻ വൈകുന്നു. അടിപ്പാതകളിൽനിന്ന് പുറത്തുവരുന്ന വാഹനങ്ങൾക്കും സർവീസ് റോഡിലൂടെ വരുന്നവർക്കും പരസ്പരം കൃത്യമായി ദൂരക്കാഴ്ച ലഭിക്കേണ്ടതുണ്ട്. നിർഭാഗ്യവശാൽ, ഇതിനാവശ്യമായ ചരിവ് പോലും പല അടിപ്പാതകൾക്കും ലഭിച്ചിട്ടില്ല.
