കെഎസ്ആർടിസി പെൻഷൻ പരിഷ്കരണം വേണ്ടെന്ന് സർക്കാർ: പ്രതിസന്ധിയിൽ പെൻഷൻകാർ
കെഎസ്ആർടിസി പെൻഷൻ തുക വർധിപ്പിക്കാൻ സാധിക്കില്ലെന്ന നിലപാടുമായി സംസ്ഥാന സർക്കാർ രംഗത്ത്. പെൻഷൻ പരിഷ്കരിക്കണമെന്ന ഹൈക്കോടതിയുടെ നിർദ്ദേശം തള്ളിക്കൊണ്ടാണ് സർക്കാർ ഉത്തരവ് പുറപ്പെടുവിച്ചിരിക്കുന്നത്. പെൻഷൻ തുക ഉയർത്തിയാൽ മാസത്തിൽ 12 കോടി രൂപയുടെ അധിക സാമ്പത്തിക ബാധ്യത ഖജനാവിന് ഉണ്ടാവുമെന്നും, അത് താങ്ങാനാവില്ലെന്നുമാണ് സർക്കാരിന്റെ വാദം.
നിലവിൽ കടുത്ത വരുമാന പ്രതിസന്ധിയിലൂടെയാണ് കെഎസ്ആർടിസി കടന്നുപോകുന്നതെന്നും, ദൈനംദിന പ്രവർത്തനങ്ങൾക്കുള്ള തുക കണ്ടെത്താൻ പോലും പ്രയാസമാണെന്നും സർക്കാർ വ്യക്തമാക്കുന്നു. അവശ്യസാധനങ്ങളുടെ വിലക്കയറ്റം മൂലം പൊറുതിമുട്ടുന്ന തങ്ങളുടെ പെൻഷൻ വർധിപ്പിക്കണമെന്ന പെൻഷൻകാരുടെ വർഷങ്ങളായുള്ള ആവശ്യമാണ് സർക്കാർ തള്ളിക്കളഞ്ഞത്.
ഏകദേശം 43,000-ത്തോളം പെൻഷൻകാരാണ് നിലവിൽ കെഎസ്ആർടിസിയിലുള്ളത്. 2011-ലെ ശമ്പള പരിഷ്കരണ നിരക്കിലാണ് ഇവർക്ക് ഇപ്പോഴും പെൻഷൻ ലഭിച്ചുകൊണ്ടിരിക്കുന്നത്. കഴിഞ്ഞ കാലയളവിൽ മൂന്നുതവണയെങ്കിലും പെൻഷൻ പരിഷ്കരണം നടക്കേണ്ടതായിരുന്നുവെങ്കിലും, അതെല്ലാം പൂർണ്ണമായും അവഗണിക്കപ്പെട്ടു. ലഭിക്കുന്ന തുച്ഛമായ തുക മരുന്നുവാങ്ങാൻ പോലും തികയാത്ത സാഹചര്യമാണെന്ന് പെൻഷൻകാർ ആശങ്ക പങ്കുവെക്കുന്നു.
മാത്രമല്ല, കൃത്യസമയത്ത് പെൻഷൻ ലഭിക്കാത്തതും വലിയൊരു പ്രതിസന്ധിയാണ്. ധനവകുപ്പിൽ നിന്നും പെൻഷൻ വിതരണത്തിനുള്ള ഫണ്ട് അനുവദിക്കുന്നതിലുണ്ടാകുന്ന കാലതാമസവും, ഉദ്യോഗസ്ഥതലത്തിലെ മെല്ലെപ്പോക്കുമാണ് പെൻഷൻ വിതരണം മുടങ്ങാൻ കാരണമാകുന്നത്. അടുത്തിടെയും ഇതേ പ്രതിസന്ധി നിലനിന്നിരുന്നു. കോർപ്പറേഷന്റെ വളർച്ചയ്ക്കായി ജീവിതത്തിന്റെ നല്ലൊരു ഭാഗം മാറ്റിവെച്ച തങ്ങളോട് സർക്കാർ ഇത്രയധികം ക്രൂരത കാണിക്കുന്നത് എന്തിനാണെന്നാണ് പെൻഷൻകാരുടെ ചോദ്യം.
