വിഷ്ണുനാഥ്: മലയാളികൾ ഒത്തൊരുമിച്ച് മുന്നോട്ട്
തിരുവനന്തപുരം: കേരളത്തിന്റെ വളർച്ചാ പാതയിലെ സുപ്രധാന നേട്ടങ്ങളിൽ അഭിമാനിക്കുന്ന ഓരോ മലയാളിയും ഒത്തൊരുമയോടെ മുന്നേറുമെന്ന് മന്ത്രി പി.സി. വിഷ്ണുനാഥ് പറഞ്ഞു. സംസ്ഥാന രൂപീകരണത്തിന്റെ എഴുപതാം വാർഷികാഘോഷങ്ങളുടെ ഭാഗമായി നിശാഗന്ധി ഓഡിറ്റോറിയത്തിൽ നടന്ന ‘ഫെസ്റ്റിവൽ ഓഫ് കേരള’ത്തിന്റെ ഉദ്ഘാടനം നിർവഹിക്കുകയായിരുന്നു അദ്ദേഹം. പ്രകൃതിരമണീയത കൊണ്ട് മാത്രമല്ല, പരസ്പരം കൈകോർത്തുപിടിച്ചും എല്ലാവരെയും ചേർത്തുനിർത്തിയും ജീവിക്കുന്ന മലയാളികളുടെ സ്വഭാവഗുണം കൊണ്ടുകൂടിയാണ് കേരളം ‘ദൈവത്തിന്റെ സ്വന്തം നാട്’ എന്ന് അറിയപ്പെടുന്നതെന്ന് അദ്ദേഹം ഓർമ്മിപ്പിച്ചു. ചടങ്ങിൽ ഭരണഭാഷാ പ്രതിജ്ഞയും അദ്ദേഹം ചൊല്ലിക്കൊടുത്തു.
കേരളം എന്ന ആശയത്തിന് 1956-ലെ സംസ്ഥാന രൂപീകരണത്തേക്കാൾ പഴക്കമുണ്ടെന്ന് ചടങ്ങിൽ അധ്യക്ഷത വഹിച്ചുകൊണ്ട് മന്ത്രി സി.പി. ജോൺ അഭിപ്രായപ്പെട്ടു. ‘കേരളകൗമുദി’ പോലുള്ള പത്രങ്ങൾ പതിറ്റാണ്ടുകൾക്ക് മുൻപേ നിലനിന്നിരുന്നു എന്നത് ഇതിന് തെളിവാണെന്നും അദ്ദേഹം ചൂണ്ടിക്കാട്ടി. പ്രയാസകരമായ ഘട്ടങ്ങളിൽ പരസ്പരം കൈത്താങ്ങായി മാറുന്നതാണ് മലയാളിത്തത്തിന്റെ മുഖമുദ്രയെന്ന് വിശിഷ്ടാതിഥിയായ നടൻ ടൊവിനോ തോമസ് പറഞ്ഞു.
ബി.പി.പി.ആർ പോർട്ടലിന്റെ ഉദ്ഘാടനവും ഇൻഫർമേഷൻ ആൻഡ് പബ്ലിക് റിലേഷൻസ് വകുപ്പ് തയ്യാറാക്കിയ ‘സമകാലിക ജനപഥം’ പ്രത്യേക പതിപ്പിന്റെ പ്രകാശനവും മന്ത്രി വിഷ്ണുനാഥ് നിർവഹിച്ചു. ഭരണഭാഷാ പുരസ്‌കാരങ്ങൾ മന്ത്രി സി.പി. ജോണും ചീഫ് സെക്രട്ടറി ബിശ്വനാഥ് സിൻഹയും ചേർന്ന് വിതരണം ചെയ്തു. പൊതുഭരണ വകുപ്പ് പ്രിൻസിപ്പൽ സെക്രട്ടറി ഡോ. ബി. അശോക്, സ്റ്റേറ്റ് പ്രോട്ടോക്കോൾ ഓഫീസർ അരവിന്ദ് ബി.എസ് തുടങ്ങിയ പ്രമുഖരും ചടങ്ങിൽ സന്നിഹിതരായിരുന്നു.
