NEWS

ഭാര്യയോട് സംസാരിച്ചതിന് അയൽവാസിയെ വെട്ടിക്കൊല്ലാൻ ശ്രമം; മണൽവാരിയെറിഞ്ഞ് തടഞ്ഞ് നാട്ടുകാർ

തിരുവനന്തപുരം വെട്ടുകാട് പ്രദേശത്ത് അയൽവാസിയുമായുണ്ടായ തർക്കത്തെത്തുടർന്ന് വെട്ടുകത്തിയുമായി ആക്രമണം നടത്തിയ ഒരാളെ നാട്ടുകാർ ചേർന്ന് പിടികൂടി പോലീസിൽ ഏൽപ്പിച്ചു. തന്റെ ഭാര്യയുമായി അയൽവാസി സംസാരിച്ചതിലുള്ള വൈരാഗ്യമാണ് ആക്രമണത്തിന് വഴിവെച്ചതെന്നാണ് പ്രാഥമിക വിവരം. സംഭവത്തിൽ വെട്ടുകാട് സ്വദേശി ജോസ് അലോഷ്യസിനെതിരെ പോലീസ് വധശ്രമത്തിന് കേസെടുക്കുകയും കോടതിയിൽ ഹാജരാക്കിയ ശേഷം റിമാൻഡ് ചെയ്യുകയും ചെയ്തു.

ഇന്നലെ രാത്രി വെട്ടുകാട് പള്ളിക്ക് സമീപം കടൽത്തീരത്ത് നിൽക്കുകയായിരുന്ന ഗോഡ്‌ഫ്രിയെ ജോസ് വെട്ടുകത്തിയുമായി എത്തി ആക്രമിക്കാൻ ശ്രമിക്കുകയായിരുന്നു. അക്രമിയുടെ കൈവശമുണ്ടായിരുന്ന ആയുധം കണ്ട് ജീവൻ രക്ഷിക്കാൻ ഗോഡ്‌ഫ്രി ഓടിയെങ്കിലും ജോസ് വിടാതെ പിന്തുടർന്നു. ഇതിനിടയിൽ തടയാൻ ശ്രമിച്ച ഭാര്യയെയും ജോസ് ആക്രമിച്ചു. ഈ ഭയാനകമായ സംഭവത്തിന്റെ ദൃശ്യങ്ങൾ ഇതിനകം പ്രചരിച്ചിട്ടുണ്ട്.

ബഹളം കേട്ട് സ്ഥലത്തെത്തിയ നാട്ടുകാർ അക്രമിയെ പിന്തിരിപ്പിക്കാൻ ശ്രമിച്ചെങ്കിലും സാധിച്ചില്ല. തുടർന്ന് നാട്ടുകാർ മണൽ വാരി ജോസിന്റെ കണ്ണിലേക്ക് എറിഞ്ഞതോടെ കാഴ്ച മങ്ങിയ അക്രമിയെ കീഴ്പ്പെടുത്തി പോലീസിന് കൈമാറുകയായിരുന്നു.

Fashion ⏭️

Back to top button