ബ്രേക്ക്ഫാസ്റ്റ് കഴിക്കേണ്ട കൃത്യമായ സമയം എപ്പോൾ? ശ്രദ്ധിക്കേണ്ട കാര്യങ്ങൾ

നമ്മുടെ ആരോഗ്യത്തിന്റെ ഏറ്റവും പ്രധാനപ്പെട്ട ശീലങ്ങളിൽ ഒന്നാണ് പ്രഭാത ഭക്ഷണം. രാത്രി ആരംഭിക്കുന്ന വിശ്രമത്തിന് ശേഷം നമ്മുടെ ശരീരത്തിന് ഊർജം നൽകുന്നതാണ് പ്രഭാത ഭക്ഷണം. എന്നാൽ പ്രഭാത ഭക്ഷണം എപ്പോൾ കഴിക്കുന്നു, എന്ത് കഴിക്കുന്നു എന്നത് ഏറ്റവും പ്രധാനപ്പെട്ടതാണ്. പ്രഭാത ഭക്ഷണം കഴിക്കാൻ ഏറ്റവും അനുയോജ്യമായ സമയം എപ്പോഴാണ്?

ഉറക്കമുണർന്ന് 30 മിനിറ്റിനും 2 മണിക്കൂറിനും ഉള്ളിൽ പ്രഭാതഭക്ഷണം കഴിക്കുന്നതാണ് ഏറ്റവും അനുയോജ്യം. സാധാരണഗതിയിൽ രാവിലെ 7 മണി മുതൽ 9 മണി വരെ ഉള്ള സമയമാണ് ഇതിന് ഏറ്റവും അനുയോജ്യം. ഉണർന്ന ഉടൻ ഭക്ഷണം കഴിക്കുന്നത് ശരീരത്തിന്റെ മെറ്റബോളിസം പ്രവർത്തനക്ഷമമാക്കാൻ സഹായിക്കുന്നു. രാത്രിയിലെ നീണ്ട ഇടവേളയ്ക്ക് ശേഷം രക്തത്തിലെ പഞ്ചസാരയുടെ അളവ് കുറവായിരിക്കും. ഇത് കൃത്യസമയത്ത് ക്രമീകരിക്കാൻ പ്രഭാത ഭക്ഷണം സഹായിക്കും.

പലരും ജോലിക്കിടയിലോ തിരക്കിനിടയിലോ 10 മണിക്ക് ശേഷമാണ് ഭക്ഷണം കഴിക്കാറുള്ളത്. കൃത്യമായ സമയത്ത് ബ്രേക്ക്ഫാസ്റ്റ് കഴിച്ചില്ലെങ്കിൽ ശരീരത്തിന് ആവശ്യമായ ഗ്ലൂക്കോസ് ലഭിക്കാത്തതിനാൽ ശ്രദ്ധ കേന്ദ്രീകരിക്കാൻ ബുദ്ധിമുട്ടും തളർച്ചയും അനുഭവപ്പെടാം. വയറ്റിലെ ആസിഡ് ഉൽപ്പാദനം കൃത്യസമയത്ത് നടക്കുമ്പോൾ ഭക്ഷണം ലഭിക്കാതെ വരുന്നത് അസിഡിറ്റിയിലേക്ക് നയിക്കാം.

കൃത്യസമയത്ത് കഴിക്കുന്നത് പോലെ തന്നെ പ്രധാനമാണ് സമീകൃതമായ ആഹാരം തിരഞ്ഞെടുക്കുന്നതും. പ്രോട്ടീൻ അടങ്ങിയ മുട്ട, ചെറുപയർ, കടല തുടങ്ങിയവ പേശികളുടെ ആരോഗ്യത്തിന് നല്ലതാണ്. ഓട്സ്, ഗോതമ്പ് ഉൽപ്പന്നങ്ങൾ, പഴവർഗ്ഗങ്ങൾ എന്നിവ ദഹനം സുഗമമാക്കും.

ചില പ്രധാന നിർദ്ദേശങ്ങൾ
വെള്ളം കുടിക്കുക
ഉണർന്ന ഉടൻ ഒരു ഗ്ലാസ് വെള്ളം കുടിക്കുന്നത് ശരീരത്തിലെ വിഷാംശങ്ങളെ പുറന്തള്ളാൻ സഹായിക്കും. അതിനശേഷം ബ്രേക്ക്ഫാസ്റ്റ് കഴിക്കുക.

വ്യായാമം ചെയ്യുന്നവരുടെ ശ്രദ്ധയ്ക്ക്
നിങ്ങൾ രാവിലെ വ്യായാമം ചെയ്യുന്നവരാണെങ്കിൽ, ലഘുവായ എന്തെങ്കിലും (ഉദാഹരണത്തിന് ഒരു നേന്ത്രപ്പഴം) കഴിച്ച ശേഷം വ്യായാമം ചെയ്യുക. വർക്കൗട്ടിന് ശേഷം 30-45 മിനിറ്റിനുള്ളിൽ പ്രധാന പ്രഭാതഭക്ഷണം കഴിക്കണം. പ്രഭാതഭക്ഷണം ഒഴിവാക്കുന്നത് ഹൃദയാരോഗ്യത്തെയും ശരീരഭാരത്തെയും ദോഷകരമായി ബാധിച്ചേക്കാം.

(ശ്രദ്ധിക്കുക: ആരോഗ്യ വിദഗ്ധന്റെയോ ന്യൂട്രീഷനിസ്റ്റിന്റെയോ ഉപദേശം തേടിയ ശേഷം മാത്രം ഭക്ഷണക്രമത്തിൽ മാറ്റം വരുത്തുക.)