കേരളത്തിൽ ഈ വർഷം ഓഗസ്റ്റ് വരെ പീഡനത്തിനിരയായത് 1732 സ്ത്രീകൾ; ദിവസേന ശരാശരി എട്ടുപേർ

കണ്ണൂർ/കോട്ടയം: കേരളത്തിൽ സ്ത്രീകൾക്ക് നേരെയുള്ള അതിക്രമങ്ങൾ ഭീതിദമായി തുടരുകയാണെന്ന് ഔദ്യോഗിക കണക്കുകൾ വ്യക്തമാക്കുന്നു. സംസ്ഥാനത്ത് ഓരോ ദിവസവും ശരാശരി എട്ടു സ്ത്രീകൾ വീതം ലൈംഗിക പീഡനത്തിന് ഇരയാകുന്നുണ്ടെന്നാണ് റിപ്പോർട്ടുകൾ സൂചിപ്പിക്കുന്നത്. ഈ വർഷം ഓഗസ്റ്റ് മാസം വരെയുള്ള കണക്കുകൾ പ്രകാരം 1732 സ്ത്രീകൾക്കാണ് ഇത്തരത്തിൽ ദുരനുഭവം നേരിടേണ്ടി വന്നത്. 2023-ൽ 2562 പേരും 2024-ൽ 2901 പേരും പീഡനത്തിനിരയായപ്പോൾ, കഴിഞ്ഞ വർഷം ഈ സംഖ്യ 2952 ആയി ഉയർന്നതും ആശങ്കയേറ്റുന്നു.
സ്ത്രീകൾക്കെതിരെയുള്ള ഭർത്താവിന്റെയും ഭർതൃവീട്ടുകാരുടെയും ക്രൂരതകൾ സംബന്ധിച്ച കേസുകളും വർധിച്ചുവരികയാണ്. നടപ്പ് വർഷം ഓഗസ്റ്റ് വരെ 2228 കേസുകളാണ് ഇത്തരം ഗാർഹിക പീഡനങ്ങളുമായി ബന്ധപ്പെട്ട് പൊലീസ് രജിസ്റ്റർ ചെയ്തത്. 2023-ൽ 4710 കേസുകളും 2024-ൽ 4515 കേസുകളും 2025-ൽ 3986 കേസുകളുമായിരുന്നു റിപ്പോർട്ട് ചെയ്യപ്പെട്ടത്.
അതേസമയം, സ്ത്രീധന മരണങ്ങളുടെ കാര്യത്തിൽ നേരിയ കുറവുണ്ടായതായി കണക്കുകൾ കാണിക്കുന്നു. കഴിഞ്ഞ വർഷം ആറ് സ്ത്രീധന മരണങ്ങൾ റിപ്പോർട്ട് ചെയ്ത സ്ഥാനത്ത്, ഈ വർഷം ഓഗസ്റ്റ് വരെ ഒരു മരണം മാത്രമാണ് ഇതുവരെ രേഖപ്പെടുത്തിയിട്ടുള്ളത്. കഴിഞ്ഞ ദശാബ്ദത്തിനിടെ സ്ത്രീധന മരണങ്ങൾ ഏറ്റവും കൂടുതൽ റിപ്പോർട്ട് ചെയ്യപ്പെട്ടത് 2016-ലാണ്; ആ വർഷം 25 സ്ത്രീകളാണ് സ്ത്രീധന പീഡനത്തെത്തുടർന്ന് ജീവൻ വെടിഞ്ഞത്.




