സഞ്ജു സാംസൺ യഥാർഥ ടീം പ്ലെയർ; ഇന്ത്യൻ വിജയത്തിന് പിന്നാലെ വാനോളം പുകഴ്ത്തി യുവരാജ് സിങ്
വെല്ലിങ്ടൻ ∙ ന്യൂസീലൻഡിനെതിരായ മൂന്നാം ട്വന്റി20 പോരാട്ടത്തിൽ ബാറ്റർമാർ നടത്തിയ വെടിക്കെട്ട് പ്രകടനത്തിനിടെ, ഇന്ത്യൻ ഓപ്പണിങ് സ്ഥാനത്തേക്ക് സഞ്ജു സാംസണ് കടുത്ത വെല്ലുവിളിയുമായി യുവതാരം വൈഭവ് സൂര്യവംശി എത്തിയിരിക്കുകയാണ്. സഞ്ജുവിന് പകരക്കാരനായി അഭിഷേക് ശർമയ്ക്കൊപ്പം ഇന്നിങ്സ് ഓപ്പൺ ചെയ്ത വൈഭവ്, നേരിട്ട 19 പന്തുകളിൽ നിന്ന് 45 റൺസാണ് അടിച്ചുകൂട്ടിയത്. നാല് വീതം സിക്സറുകളും ഫോറുകളും അടങ്ങുന്നതായിരുന്നു ഈ കൗമാരതാരത്തിന്റെ മിന്നുന്ന പ്രകടനം. അഭിഷേക് ശർമയോടൊപ്പം ചേർന്ന് വൈഭവ് ക്രീസിൽ തകർത്താടിയതോടെ ഇന്ത്യൻ ഇന്നിങ്സിന് റെക്കോർഡ് പവർപ്ലേ സ്കോർ സ്വന്തമാക്കാനായി.
അഭിഷേകിന്റെയും വൈഭവിന്റെയും തകർപ്പൻ ബാറ്റിങ്ങിന് മുന്നിൽ സഞ്ജു സാംസന്റെ ഇന്നിങ്സ് അല്പം മങ്ങിപ്പോയെങ്കിലും, താരത്തെ അഭിനന്ദിക്കാൻ മുൻ ഇന്ത്യൻ ഇതിഹാസം യുവരാജ് സിങ് മറന്നില്ല. മത്സരശേഷം അഭിഷേകിനെയും വൈഭവിനെയും വാനോളം പുകഴ്ത്തിയ യുവരാജ്, മൂന്നാം നമ്പറിൽ ബാറ്റു ചെയ്ത സഞ്ജുവിന്റെ പ്രകടനത്തെ പ്രത്യേകമായി എടുത്തുപറയുകയും അഭിനന്ദനം അറിയിക്കുകയും ചെയ്തു. മത്സരത്തിൽ മികച്ച പ്രകടനം പുറത്തെടുത്ത ഇന്ത്യൻ ബൗളിങ് നിരയെയും യുവരാജ് പ്രശംസ കൊണ്ട് മൂടി.
