സ്വകാര്യ ആശുപത്രിയുടെ പണം തട്ടിപ്പ്: തിരുവനന്തപുരം ഡിസിസി അംഗം അറസ്റ്റിൽ

തിരുവനന്തപുരം: സ്വകാര്യ ആശുപത്രി ഉടമയെ ഭീഷണിപ്പെടുത്തി പത്തുലക്ഷം രൂപ കൈക്കലാക്കിയ സംഭവത്തിൽ ഡിസിസി അംഗം സുഹൈൽ ഷാജഹാൻ പിടിയിലായി. ആനയറയിലുള്ള സബൈൻ ഹോസ്പിറ്റലിന്റെ ചെയർമാൻ ഡോ. സബൈൻ ശിവദാസ് നൽകിയ പരാതിയുടെ അടിസ്ഥാനത്തിൽ പേട്ട പൊലീസാണ് ഇയാളെ കസ്റ്റഡിയിലെടുത്തത്. സുഹൈൽ ഉൾപ്പെടെ അഞ്ചുപേർക്കെതിരെയാണ് ഈ വിഷയത്തിൽ കേസെടുത്തിരിക്കുന്നത്.
തങ്ങൾക്കെതിരെ ഓൺലൈൻ മാധ്യമത്തിൽ തെറ്റായ വാർത്ത നൽകിയെന്നും, ഇത് നീക്കം ചെയ്യണമെങ്കിൽ പണം നൽകണമെന്നും ആവശ്യപ്പെട്ട് ആശുപത്രി അധികൃതരെ ഇവർ ഭീഷണിപ്പെടുത്തുകയായിരുന്നു. ഇതിനായി പത്തുലക്ഷം രൂപയാണ് ഇവർ ആവശ്യപ്പെട്ടത്. സുഹൈലിന്റെ ഭീഷണിയെക്കുറിച്ച് ആശുപത്രി അധികൃതർ നേരത്തെ തന്നെ സിറ്റി പൊലീസ് കമ്മിഷണർക്ക് പരാതി നൽകിയിരുന്നു.
ഇന്നലെ പണം കൈപ്പറ്റാനായി ആശുപത്രിയിൽ എത്തിയപ്പോഴാണ് സുഹൈലിനെ ജീവനക്കാർ പിടികൂടി പൊലീസിൽ വിവരമറിയിച്ചത്. തുടർന്ന് സ്ഥലത്തെത്തിയ പേട്ട എസ്എച്ച്ഒയുടെ നേതൃത്വത്തിലുള്ള പൊലീസ് സംഘം, തട്ടിയെടുത്ത തുക സഹിതം സുഹൈലിനെ കസ്റ്റഡിയിലെടുക്കുകയായിരുന്നു.




