കഴക്കൂട്ടം–കന്യാകുമാരി യാത്ര ഒന്നര മണിക്കൂർ; കാരോട്– കന്യാകുമാരി ബൈപാസ് നിർമാണം അന്തിമഘട്ടത്തിൽ

പാറശാല ∙ കേരളത്തെയും തമിഴ്നാടിനെയും തമ്മിൽ കോർത്തിണക്കുന്ന ദേശീയപാത 66-ന്റെ ഭാഗമായുള്ള കാരോട്–കന്യാകുമാരി ബൈപാസ് നിർമാണം അന്തിമഘട്ടത്തിലേക്ക് കടന്നിരിക്കുകയാണ്. കഴക്കൂട്ടം മുതൽ കാരോട് വരെയുള്ള കേരളത്തിലെ 45 കിലോമീറ്റർ ദൂരമുള്ള പാതയുടെ പണി വർഷങ്ങൾക്ക് മുൻപേ പൂർത്തിയായിരുന്നുവെങ്കിലും, ഇതിന്റെ തുടർച്ചയായ തമിഴ്നാട് ഭാഗത്തെ നിർമാണ പ്രവർത്തനങ്ങൾ ഏറെക്കാലമായി മന്ദഗതിയിലായിരുന്നു. മണ്ണിന്റെ ക്ഷാമവും അപ്രതീക്ഷിതമായി എത്തിയ മഴയും മൂലം തടസ്സപ്പെട്ടു കിടന്ന പ്രവൃത്തികൾ കഴിഞ്ഞ വർഷത്തോടെയാണ് വീണ്ടും വേഗത കൈവരിച്ചത്.
കാരോട് മുതൽ കന്യാകുമാരി വരെയുള്ള 54 കിലോമീറ്റർ ദൈർഘ്യമുള്ള പാതയിൽ നിലവിൽ കാരോട് മുതൽ കാപ്പിക്കാട് വരെയുള്ള 10 കിലോമീറ്റർ ഭാഗമാണ് ഗതാഗതത്തിനായി തുറന്നുകൊടുത്തിരിക്കുന്നത്. നിലവിൽ കാറുകൾ ഉൾപ്പെടെയുള്ള വാഹനങ്ങൾ കാപ്പിക്കാട് വരെ സുഗമമായി സഞ്ചരിച്ചു തുടങ്ങിയിട്ടുണ്ട്. കാരോട് പഞ്ചായത്തിന്റെ അതിർത്തിയായ ചെങ്കവിളയിൽ നിന്നും കുളപ്പുറം, കുഴിവിള, അതങ്കോട്, കോയിക്കവിളാകം വഴി കാപ്പിക്കാട് എത്താൻ വെറും 8 മുതൽ 10 മിനിറ്റ് മാത്രം മതിയാകും. തിരുവനന്തപുരം ഭാഗത്തുനിന്നും തക്കല, മാർത്താണ്ഡം, കുഴിത്തുറ, കരുങ്കൽ, തേങ്ങാപ്പട്ടണം, പുതുക്കട, മങ്കാട്, മുഞ്ചിറ തുടങ്ങിയ സ്ഥലങ്ങളിലേക്ക് ഈ ബൈപാസ് വഴി വളരെ എളുപ്പത്തിൽ എത്തിച്ചേരാൻ സാധിക്കുന്നുണ്ട്. കരമന–കളിയിക്കാവിള പാതയിലെ തിരക്ക് ഒഴിവാക്കാൻ ആഗ്രഹിക്കുന്ന വലിയൊരു വിഭാഗം സ്വകാര്യ വാഹന യാത്രക്കാരും ഇപ്പോൾ യാത്രാമാർഗ്ഗമായി ഈ പുതിയ ബൈപാസിനെയാണ് തിരഞ്ഞെടുക്കുന്നത്.




