SPORTS

ജസ്പ്രീത് ബുമ്ര റെക്കോർഡ് ബുക്കിൽ; ശ്രീശാന്തിനും സഹീർ ഖാനുമൊപ്പം കിവീസ് പരമ്പരയിൽ നാണക്കേടിന്റെ റെക്കോർഡ്

വെല്ലിങ്ടൻ ടെസ്റ്റിൽ ന്യൂസീലൻഡിന്റെ രണ്ടാം ഇന്നിങ്‌സ് ആരംഭിച്ചപ്പോൾ തന്നെ ഇന്ത്യൻ പേസർ ജസ്പ്രീത് ബുമ്രയുടെ തീപ്പൊരി ബൗളിങ്ങിന് മുന്നിൽ കിവീസ് നായകൻ ടോം ലാതം വീണു. താൻ എറിഞ്ഞ ആദ്യ ഓവറിൽ തന്നെ വിക്കറ്റ് പിഴുത ബുമ്ര, ലാതമിനെ റണ്ണൊന്നുമെടുക്കാതെ മടക്കി അയച്ചു. ഈ മത്സരത്തിലെ ആദ്യ ഇന്നിങ്‌സിലും തുടക്കത്തിൽ തന്നെ ലാതമിനെ പുറത്താക്കാൻ ബുമ്രയ്ക്ക് സാധിച്ചിരുന്നു. സീമിൽ കുത്തി അകത്തേക്ക് തിരിഞ്ഞു വന്ന പന്ത് ലാതമിന് കണക്കുകൂട്ടാൻ കഴിയാതെ പോയപ്പോൾ സ്റ്റംപുകൾ തെറിക്കുകയായിരുന്നു.

ഈ നേട്ടത്തോടെ ഒരു ടെസ്റ്റ് മത്സരത്തിന്റെ രണ്ട് ഇന്നിങ്‌സുകളിലും ആദ്യ ഓവറിൽ തന്നെ വിക്കറ്റ് സ്വന്തമാക്കിയ ഇന്ത്യൻ ബോളർമാരുടെ എലൈറ്റ് പട്ടികയിലേക്ക് ബുമ്രയും ചേക്കേറി. മുൻതാരങ്ങളായ സഹീർ ഖാൻ, എസ്. ശ്രീശാന്ത് എന്നിവർക്ക് ശേഷം ഈ നേട്ടത്തിൽ എത്തുന്ന മൂന്നാമത്തെ ഇന്ത്യൻ ബോളറാണ് ബുമ്ര.

അതേസമയം, കരിയറിൽ ഒട്ടും ആഗ്രഹിക്കാത്തൊരു നാണക്കേടിന്റെ റെക്കോർഡും ലാതമിനെ തേടിയെത്തി. ഒരു ടെസ്റ്റ് മത്സരത്തിന്റെ രണ്ട് ഇന്നിങ്‌സുകളിലും അക്കൗണ്ട് തുറക്കും മുൻപേ പുറത്താകുന്ന മൂന്നാമത്തെ ന്യൂസീലൻഡ് ക്യാപ്റ്റനായി ഇതോടെ ലാതം മാറി. ക്രിക്കറ്റ് ഭാഷയിൽ ‘പെയർ’ എന്ന് വിളിക്കുന്ന ഈ മോശം പ്രകടനം നേരത്തെ 1956-ൽ ഹാരി കേവും 1997-ൽ സ്റ്റീഫൻ ഫ്ലെമിങ്ങും മാത്രമാണ് നേരിട്ടിട്ടുള്ളത്.

Auto ⏭️

Back to top button