മരപ്പണിക്കാരനിൽ നിന്ന് ഭീകരനിലേക്ക്: കശ്മീരിലെ തിരക്കേറിയ തെരുവിലിറങ്ങി വെടിയുതിർത്ത ഭട്ടിനെ വധിച്ചു സൈന്യം

ശ്രീനഗർ∙ തെക്കൻ കശ്മീരിലെ പ്രധാനപ്പെട്ട ഭീകര പ്രവർത്തകരിലൊരാളായ മുഹമ്മദ് ലത്തീഫ് ഭട്ടിനെ (23) സുരക്ഷാ സേന ഏറ്റുമുട്ടലിലൂടെ വധിച്ചു. കുൽഗാം സ്വദേശിയായ ഭട്ടിനെ പിടികൂടാൻ നീണ്ട ഒരു വർഷത്തെ പരിശ്രമമാണ് സൈന്യം നടത്തിവന്നത്. കഴിഞ്ഞ വാരം കുൽഗാമിൽ മൂന്ന് സിആർപിഎഫ് ജവാന്മാരുടെ ജീവനെടുത്ത ആക്രമണത്തിന് ചുക്കാൻ പിടിച്ചത് ഭട്ടായിരുന്നു.
2025 നവംബറിലാണ് ഭട്ട് ഒളിവിൽ പോകുന്നത്. അന്നുമുതൽ സുരക്ഷാ ഉദ്യോഗസ്ഥർക്കും നാട്ടുകാർക്കും നേരെ നടന്ന ഒട്ടേറെ ആക്രമണ സംഭവങ്ങളിൽ ഇയാൾക്ക് നേരിട്ട് പങ്കുണ്ടെന്നാണ് റിപ്പോർട്ടുകൾ. മരപ്പണി ഉപജീവനമാർഗ്ഗമാക്കിയിരുന്ന ഇയാൾ എങ്ങനെയാണ് ഭീകരവാദത്തിന്റെ പാതയിലേക്ക് വഴിമാറിയതെന്ന കാര്യത്തിൽ കൃത്യമായ നിഗമനങ്ങളില്ല. 2025 നവംബർ 17-ഓടെ ലഷ്കറെ തയിബയുമായി സഹകരിക്കുന്ന ‘കശ്മീർ റവല്യൂഷൻ ആർമി’യിൽ ഇയാൾ ചേർന്നതായി സമൂഹമാധ്യമങ്ങളിലൂടെ വാർത്തകൾ പുറത്തുവന്നിരുന്നു. പിന്നാലെ, നവംബർ 19-ന് ഭട്ടിനെ കാണാനില്ലെന്ന് കാണിച്ച് ബന്ധുക്കൾ കുൽഗാം പോലീസിൽ പരാതിപ്പെടുകയും ചെയ്തു.
സിആർപിഎഫ് ജവാന്മാർ ആക്രമിക്കപ്പെട്ടതിന് ശേഷം കഴിഞ്ഞ ഒരു വാരമായി സുരക്ഷാ ഏജൻസികൾ ഇയാൾക്കായി ശക്തമായ തെരച്ചിൽ നടത്തിവരികയായിരുന്നു. ആക്രമണം നടന്ന പ്രദേശത്തെ സിസിടിവി ദൃശ്യങ്ങൾ പരിശോധിച്ചതിൽ നിന്ന് ഭട്ടിന്റെ സാന്നിധ്യം ഉദ്യോഗസ്ഥർ സ്ഥിരീകരിച്ചിരുന്നു. തിങ്കളാഴ്ച ഇയാളെയും ഒപ്പമുണ്ടായിരുന്നയാളെയും സൈന്യം വളഞ്ഞുവെങ്കിലും ഒരാൾ കൊല്ലപ്പെടുകയും ഭട്ട് തലനാരിഴയ്ക്ക് രക്ഷപ്പെടുകയുമായിരുന്നു. തുടർന്ന് നടത്തിയ ഊർജ്ജിതമായ തെരച്ചിലിലാണ് ഒടുവിൽ ഭട്ടിനെ വധിക്കാൻ സുരക്ഷാ സേനയ്ക്ക് കഴിഞ്ഞത്.




