‘മുരശ്’ ചുഴലിക്കാറ്റ് കരതൊട്ടു: കേരളത്തിലെ 5 ജില്ലകളിൽ യെലോ അലർട്ട്
അമരാവതി: ബംഗാൾ ഉൾക്കടലിൽ രൂപപ്പെട്ട ‘മുരശ്’ ചുഴലിക്കാറ്റ് ആന്ധ്രാതീരത്ത് കരതൊട്ടു. നെല്ലൂരിനും നർസപുരിനും ഇടയിലുള്ള പ്രദേശങ്ങളിലൂടെയാണ് ചുഴലിക്കാറ്റ് കടന്നുപോയത്. മണിക്കൂറിൽ 100 മുതൽ 110 കിലോമീറ്റർ വരെയും, ചില സാഹചര്യങ്ങളിൽ 120 കിലോമീറ്റർ വരെയും വേഗതയിൽ വീശിയടിക്കാവുന്ന അതിശക്തമായ കാറ്റിനും പേമാരിക്കുമുള്ള സാധ്യതയാണ് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകുന്നത്. ദുരന്തസാഹചര്യം കണക്കിലെടുത്ത് 19 വിമാനങ്ങളും 15 ട്രെയിനുകളും ഇതിനകം റദ്ദാക്കി.
ആന്ധ്രാപ്രദേശ്, തമിഴ്‌നാട്, ഒഡീഷ, തെലങ്കാന എന്നീ സംസ്ഥാനങ്ങളിൽ വ്യാപകമായ മഴയാണ് റിപ്പോർട്ട് ചെയ്യുന്നത്. ആന്ധ്രയുടെ തീരദേശ മേഖലകളായ നെല്ലൂർ, കൃഷ്ണ, പ്രകാശം, ബാപട്‌ല എന്നിവിടങ്ങളിൽ ശക്തമായ കാറ്റിൽ നിരവധി മരങ്ങൾ കടപുഴകി വീണു. ഒഡീഷയിലെ ഗഞ്ചം, ഗജപതി, കോരാപുട്, പുരി ഉൾപ്പെടെയുള്ള എട്ടു തെക്കൻ ജില്ലകളിൽ അതീവ ജാഗ്രതാനിർദേശം പുറപ്പെടുവിച്ചിട്ടുണ്ട്.
അതേസമയം, കേരളത്തിലും മഴ മുന്നറിയിപ്പ് തുടരുകയാണ്. മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിൽ ഇന്ന് യെലോ അലർട്ട് പ്രഖ്യാപിച്ചിരിക്കുന്നു. കൂടാതെ, ആറാം തീയതി ആലപ്പുഴ, കോട്ടയം, ഇടുക്കി, എറണാകുളം, തൃശൂർ, പാലക്കാട് എന്നീ ജില്ലകളിലും യെലോ അലർട്ട് നിലവിലുണ്ട്. ഒറ്റപ്പെട്ടയിടങ്ങളിൽ ശക്തമായ മഴ ലഭിക്കുമെന്നാണ് പ്രവചനം.
