എല്ലാ പ്രായത്തിലുമുള്ള സ്ത്രീകൾക്ക് പ്രവേശനം അനുവദിക്കുന്ന അയ്യപ്പക്ഷേത്രം

ഭക്തിസാന്ദ്രമായ ശരണമന്ത്രധ്വനികളാൽ മുഖരിതമായ മണ്ഡലകാലത്തിന് തുടക്കമായി. മഞ്ഞുപുതച്ച വൃശ്ചികമാസത്തിൻ്റെ പുലരികളിലും സന്ധ്യകളിലും അയ്യപ്പഭക്തി അലയടിക്കുന്നു. പ്രായഭേദമന്യേ എല്ലാ സ്ത്രീകൾക്കും പതിനെട്ടു പടികൾ ചവിട്ടി അയ്യനെ ദർശിക്കാൻ അവസരമൊരുക്കുന്ന അപൂർവം ക്ഷേത്രങ്ങളിലൊന്നാണ് വടക്കൻ കേരളത്തിലുള്ളത്. കോഴിക്കോട് ജില്ലയിലെ മണിയൂരിലാണ് വിശ്വാസികളുടെ നെഞ്ചിലേറ്റുന്ന കുറുന്തോടി അയ്യപ്പ ക്ഷേത്രം സ്ഥിതി ചെയ്യുന്നത്.
പ്രകൃതിയുടെ മനോഹാരിത നിറഞ്ഞ അന്തരീക്ഷത്തിൽ, ഒരു ഗ്രാമത്തിൻ്റെയാകെ ആത്മീയ സമർപ്പണമായി ഈ ക്ഷേത്രം നിലകൊള്ളുന്നു. ശബരിമലയുടെ തനിമ ഒട്ടും ചോരാതെ പിച്ചളത്തകിടിൽ പൊതിഞ്ഞ പതിനെട്ടു പടികൾ തന്നെയാണ് ഇവിടുത്തെ മുഖ്യ ആകർഷണം. പ്രായത്തിൻ്റെ അതിർവരമ്പുകളില്ലാതെ ഏത് സ്ത്രീക്കും ഈ തിരുപ്പടികൾ ചവിട്ടി അയ്യപ്പസ്വാമിയെ തൊഴാൻ ഇവിടെ അനുമതിയുണ്ട്.
പതിനെട്ടു പടികളും കയറി മുന്നിലെത്തിയാൽ ‘തത്ത്വമസി’ എന്ന മഹാവാക്യം കൊത്തിവെച്ച ശ്രീകോവിലും ശാന്തമായ ക്ഷേത്രാങ്കണവും ഭക്തരെ സ്വാഗതം ചെയ്യുന്നു. ക്ഷേത്രത്തിനു മുൻപിലായി എപ്പോഴും തെളിഞ്ഞുനിൽക്കുന്ന കൽവിളക്കും ഭക്തിയുടെ പ്രഭ പരത്തുന്നു. ഉയർന്ന പ്രദേശമായിരുന്നിട്ടും കിണർ കുഴിച്ചപ്പോൾ അത്ഭുതകരമായി ഉറവ പൊട്ടിയ ഇവിടുത്തെ ക്ഷേത്രക്കിണർ ഏവരെയും വിസ്മയിപ്പിക്കുന്നു. ക്ഷേത്രത്തിൻ്റെ ഇടതുവശത്തുള്ള ചെമ്പരത്തിച്ചെടിയിൽ ശബരിമല തീർത്ഥാടനം കഴിഞ്ഞ് തിരിച്ചെത്തിയ ഭക്തർ സമർപ്പിച്ച മാലകൾ കാണാം. മണികണ്ഠൻ, പന്തളം രാജാവ്, മുനിശ്രേഷ്ഠൻ എന്നിവരുടെ ശിലാരൂപങ്ങളും ഇവിടെ പ്രതിഷ്ഠിച്ചിട്ടുണ്ട്. ഇതൊരു നാടിൻ്റെയാകെ ഭക്തിനിർഭരമായ സമർപ്പണമാണ്.




