NEWS

ഗുരുവായൂർ ക്ഷേത്ര ജീവനക്കാരുടെ പെരുമാറ്റം: കർശന നിർദ്ദേശവുമായി ഹൈക്കോടതി

കൊച്ചി∙ ഗുരുവായൂർ ക്ഷേത്രത്തിലെത്തുന്ന തീർഥാടകരോട് ജീവനക്കാർ യാതൊരു കാരണവശാലും മോശമായി പെരുമാറരുതെന്നും അതീവ ക്ഷമയോടെയും വിനയത്തോടെയും സേവനം അനുഷ്ഠിക്കണമെന്നും ഹൈക്കോടതി കർശന നിർദേശം നൽകി. ക്ഷേത്രത്തിലെ ജീവനക്കാരുടെ ഭാഗത്തുനിന്ന് വിശ്വാസികൾക്ക് നേരിടേണ്ടി വന്ന അപമാനങ്ങളും ദുരനുഭവങ്ങളും സംബന്ധിച്ച പരാതികളുടെ അടിസ്ഥാനത്തിൽ ഹൈക്കോടതി സ്വമേധയാ എടുത്ത കേസിലാണ് ജസ്റ്റിസ് ദേവൻ രാമചന്ദ്രൻ, ജസ്റ്റിസ് ബസന്ത് ബാലാജി എന്നിവരടങ്ങുന്ന ദേവസ്വം ബെഞ്ച് ഇത്തരമൊരു ഉത്തരവ് പുറപ്പെടുവിച്ചത്.

ഭക്തജനങ്ങളോട് ഒരു സാഹചര്യത്തിലും ദേഷ്യം കാണിക്കരുതെന്നും പൂർണ സമചിത്തതയോടെ ഇടപെടണമെന്നും കോടതി വ്യക്തമാക്കുകയുണ്ടായി. എത്ര വലിയ പ്രകോപനപരമായ സാഹചര്യമുണ്ടായാലും തർക്കങ്ങളിലേക്കോ മോശം പെരുമാറ്റത്തിലേക്കോ തിരിയരുതെന്ന് കോടതി താക്കീത് നൽകി. കോടതിയുടെ നിർദേശങ്ങൾ പൂർണ്ണമായി ഉൾക്കൊള്ളുമെന്നും അവ അടിയന്തരമായി നടപ്പിലാക്കുമെന്നും ഗുരുവായൂർ ദേവസ്വം ബോർഡ് അഭിഭാഷകൻ കോടതിക്ക് ഉറപ്പുനൽകി. ഇതിന്റെ അടിസ്ഥാനത്തിൽ കോടതി ഹർജി തീർപ്പാക്കി.

ഏകാദശി ദിനത്തിൽ ഉച്ചയ്ക്ക് ശേഷം കാഴ്ചശീവേലി ഉണ്ടായിരിക്കുന്നതല്ല. അർധരാത്രിയോടെ വിളക്കെഴുന്നള്ളിപ്പ് ആരംഭിക്കും. മേൽപുത്തൂർ ഓഡിറ്റോറിയത്തിൽ നടന്നുവരുന്ന പതിനഞ്ച് ദിവസത്തെ ചെമ്പൈ സംഗീതോത്സവം നാളെ രാത്രി പത്ത് മണിക്ക് ചെമ്പൈ വൈദ്യനാഥ ഭാഗവതരുടെ പ്രിയ കീർത്തനങ്ങൾ ആലപിച്ചുകൊണ്ട് സമാപിക്കും. നാളെ പാതിരാത്രിയോടെ കൂത്തമ്പലത്തിൽ ദ്വാദശിപ്പണ സമർപ്പണ ചടങ്ങുകൾക്ക് തുടക്കമാകും. അഗ്നിഹോത്രികൾക്ക് ദ്വാദശിപ്പണം നൽകി ഭക്തർ തങ്ങളുടെ വ്രതം പൂർത്തിയാക്കും. ഈ മാസം 22-ന് രാവിലെ ഏഴ് മണി മുതൽ അന്നലക്ഷ്മി ഹാളിൽ പതിനായിരക്കണക്കിന് ആളുകൾക്ക് ദ്വാദശിയൂട്ട് നൽകുന്നതോടെ ഇത്തവണത്തെ ഏകാദശി ആഘോഷങ്ങൾക്ക് പരിസമാപ്തിയാകും.

Fashion ⏭️

Back to top button