SPORTS

ധോണിയോട് അസഭ്യം പറഞ്ഞ സഹതാരം: മഹി നൽകിയ മറുപടി വെളിപ്പെടുത്തി മുൻ ഇന്ത്യൻ താരം

ഐപിഎല്ലിൽനിന്ന് പടിയിറങ്ങിയ ക്രിക്കറ്റ് ഇതിഹാസം എം.എസ്. ധോണിയുടെ നേതൃപാടവത്തെക്കുറിച്ചുള്ള പുതിയൊരു വെളിപ്പെടുത്തലുമായി രംഗത്തെത്തിയിരിക്കുകയാണ് മുൻ ഇന്ത്യൻ താരവും പ്രമുഖ കമന്റേറ്ററുമായ ആകാശ് ചോപ്ര. 2023-ലെ ഐപിഎൽ സീസൺ വേളയിൽ ചെന്നൈ സൂപ്പർ കിങ്സ് ക്യാമ്പിൽ നടന്ന ഒരു സംഭവമാണ് ചോപ്ര ഇപ്പോൾ പങ്കുവെച്ചിരിക്കുന്നത്. കളിക്കളത്തിലെ ധോണിയുടെ അസാമാന്യമായ പക്വതയും ടീമിനെ മുന്നിൽനിന്ന് നയിക്കാനുള്ള അദ്ദേഹത്തിന്റെ അനിതരസാധാരണമായ കഴിവും വ്യക്തമാക്കുന്നതാണ് ഈ വെളിപ്പെടുത്തൽ.

ചോപ്രയുടെ വാക്കുകളിലൂടെ: ‘‘അവൻ ഒരു വിഡ്ഢിയെപ്പോലെയാണ് പെരുമാറുന്നത്. എന്നാൽ ഞാൻ ടീമിന്റെ ക്യാപ്റ്റനാണ്. എന്റെ ഈഗോയ്ക്ക് ഞാൻ വലിയ പ്രാധാന്യം നൽകുകയാണെങ്കിൽ, നിമിഷങ്ങൾക്കുള്ളിൽ അവന്റെ ബാഗ് പാക്ക് ചെയ്ത് നാട്ടിലേക്ക് മടക്കി അയക്കാൻ എനിക്ക് കഴിയും. പക്ഷേ, ആ താരത്തിന്റെ കഴിവും ടീമിന് ലഭിക്കുന്ന സംഭാവനകളും എനിക്കറിയാം. ചെന്നൈയുടെ ജയത്തിൽ അവൻ നിർണായകമായ പങ്ക് വഹിക്കും. അതുകൊണ്ട് തന്നെ, എന്റെ അഭിമാനവും ഈഗോയും മാറ്റിവെച്ച് അവനെ ടീമിൽ നിലനിർത്താനും കളിപ്പിക്കാനും ഞാൻ തയ്യാറാണ്.’’– ധോണി അന്ന് പറഞ്ഞതായി ആകാശ് ചോപ്ര ഓർമ്മിച്ചെടുത്തു.

ഐപിഎൽ ചരിത്രത്തിൽ ഒരു ഫ്രാഞ്ചൈസിയെ 200-ലധികം മത്സരങ്ങളിൽ നയിച്ച ആദ്യത്തെ താരമെന്ന അപൂർവ്വ നേട്ടം ഇതിനകം ധോണി സ്വന്തമാക്കിയിട്ടുണ്ട്. ചെന്നൈ സൂപ്പർ കിങ്സിനൊപ്പമുള്ള തന്റെ കരിയറിന്റെ ഏറിയ പങ്കും ടീമിനെ നയിച്ചത് അദ്ദേഹം തന്നെയായിരുന്നു. 2022-ലെ ഐപിഎൽ സീസണിൽ രവീന്ദ്ര ജഡേജയെ നായകനായി നിയമിച്ചെങ്കിലും പിന്നീട് ധോണി തന്നെ ആ ഉത്തരവാദിത്തം വീണ്ടും ഏറ്റെടുക്കുകയായിരുന്നു. ഒടുവിൽ 2024-ൽ ഋതുരാജ് ഗെയ്‌ക്‌വാദിലേക്ക് ക്യാപ്റ്റൻസി കൈമാറിക്കൊണ്ടാണ് അദ്ദേഹം നേതൃസ്ഥാനത്ത് നിന്ന് മാറിയത്.

Auto ⏭️

Back to top button