NEWS

ജയബാലകൃഷ്ണന്റെ ഓർമ്മകളുമായി മകൾ: തട്ടുകട ബാക്കിവെച്ച ജീവിതം

ചിറ്റൂർ ∙ തീരാദുഃഖത്തിനിടയിലും ജീവിതം കരുപ്പിടിപ്പിക്കാൻ വീണ്ടും അടുക്കളയിൽ തീ പകർന്നിരിക്കുകയാണ് ബിന്ദുവും മകൾ ഭദ്രകീർത്തിയും. കണ്ടെയ്നർ റോഡിൽ അമിതവേഗതയിലെത്തിയ പതിനേഴുകാരൻ ഓടിച്ച കാറിടിച്ച് മരിച്ച ജയബാലകൃഷ്ണന്റെ തട്ടുകടയാണ്, തിങ്കളാഴ്ച മുതൽ ഈ അമ്മയും മകളും ചേർന്ന് വീണ്ടും സജീവമാക്കിയത്. തങ്ങളുടെ പ്രിയപ്പെട്ടവന്റെ വിയോഗത്തിൽ തളർന്നുപോയെങ്കിലും, കുടുംബത്തിന്റെ ഏക വരുമാന മാർഗമായിരുന്ന ഈ കൊച്ചു കടയുടെ ഷട്ടർ ഉയർത്താൻ അവർ നിർബന്ധിതരാകുകയായിരുന്നു.

ജയബാലകൃഷ്ണന്റെ ചിത്രത്തിന് മുന്നിൽ ദീപം തെളിച്ചുകൊണ്ടാണ് അവർ വീണ്ടും കച്ചവടം ആരംഭിച്ചത്. അച്ഛൻ വിട്ടുപിരിഞ്ഞതോടെ പ്രതിസന്ധിയിലായ ജീവിതത്തെ മുന്നോട്ടുനയിക്കാൻ മറ്റുവഴികളില്ലാതെയാണ് അവർ ഈ തീരുമാനമെടുത്തത്. തന്റെ അച്ഛൻ വെറുമൊരു തട്ടുകട മാത്രമല്ല, ഒരുപിടി മധുരമായ ഓർമകൾ കൂടിയാണ് തനിക്ക് സമ്മാനിച്ചതെന്ന് ഭദ്രകീർത്തി വികാരനിർഭരയായി പറയുന്നു. ആ ഓർമ്മകളെ നെഞ്ചോടുചേർത്താണ് കടയുടെ പ്രവർത്തനങ്ങൾ പുനരാരംഭിച്ചത്.

ജയബാലകൃഷ്ണന്റെ കൈപ്പുണ്യത്തിൽ ജനം ആസ്വദിച്ചിരുന്ന അതേ ദോശയും ചമ്മന്തിയും ഓംലെറ്റും ചായയും തന്നെയാണ് ഇന്നും ഇവിടെ ലഭിക്കുന്നത്. ഹൈദരാബാദിലുണ്ടായിരുന്ന ജോലി താൽക്കാലികമായി മാറ്റിവെച്ചാണ് ഭദ്രകീർത്തി ഇപ്പോൾ അമ്മയെ സഹായിക്കാൻ കടയിലുള്ളത്. അച്ഛന്റെ മരണത്തിന് കാരണക്കാരായവർക്കെതിരെയുള്ള നിയമപോരാട്ടം കൃത്യമായി മുന്നോട്ടുകൊണ്ടുപോകുന്നുണ്ടെന്നും, എതിർഭാഗത്ത് പ്രബലരായ അഭിഭാഷകരുള്ളതിനാൽ അതീവ ശ്രദ്ധയോടെയാണ് കേസ് കൈകാര്യം ചെയ്യുന്നതെന്നും ഭദ്രകീർത്തി വ്യക്തമാക്കി.

അപകടം നടന്നപ്പോൾ പതിനേഴുകാരൻ കാർ ഓടിച്ചത് 104 കിലോമീറ്റർ വേഗതയിലായിരുന്നു. അമിതവേഗതയിൽ വാഹനം ഓടിക്കുന്ന ദൃശ്യങ്ങൾ പ്രതി തന്നെ മൊബൈൽ ഫോണിൽ പകർത്തിയിരുന്നു. ഈ തെളിവുകൾ ഇപ്പോൾ പോലീസിന് ലഭിച്ചിട്ടുണ്ട്. ലൈസൻസില്ലാതെ വാഹനം ഓടിച്ചതിനും നിശ്ചിത പരിധിയിൽ കൂടുതൽ വേഗതയിൽ വാഹനം ഓടിച്ചതിനും മോട്ടർ വാഹന നിയമത്തിലെ 181, 183 വകുപ്പുകൾ പ്രകാരം പ്രതിക്കെതിരെ കേസെടുത്തിട്ടുണ്ട്.

Fashion ⏭️

Back to top button