പഞ്ചസാര വിതരണം തടഞ്ഞ് കർഷകർ; കേരളത്തിൽ ക്ഷാമഭീതി
കോഴിക്കോട് ∙ അവശ്യസാധനങ്ങളുടെ വിലക്കയറ്റം സാധാരണക്കാരുടെ കുടുംബ ബജറ്റിനെ താറുമാറാക്കിയിരിക്കുകയാണ്. പലചരക്ക് സാധനങ്ങൾക്കും പച്ചക്കറികൾക്കും പൊള്ളുന്ന വിലയാണ് വിപണിയിൽ അനുഭവപ്പെടുന്നത്. ദിനംപ്രതി വില ഉയരുന്ന പ്രവണതയാണ് മൊത്തവ്യാപാര കേന്ദ്രങ്ങളിൽ കാണുന്നതെന്ന് വ്യാപാരികൾ ചൂണ്ടിക്കാട്ടുന്നു.
അരിവിലയിൽ കിലോയ്ക്ക് 7 രൂപ മുതൽ 25 രൂപ വരെയാണ് ഒറ്റയടിക്ക് വർധിച്ചത്. കഴിഞ്ഞ ഒരു മാസമായി പച്ചക്കറി വിപണിയിൽ തുടരുന്ന വിലക്കയറ്റം ജനങ്ങളെ വലിയ പ്രതിസന്ധിയിലാക്കിയിട്ടുണ്ട്. ഇതിനിടെ, തങ്ങൾക്ക് ന്യായമായ വില ലഭിക്കണമെന്ന ആവശ്യവുമായി കർണാടകയിലെ കരിമ്പ് കർഷകർ പഞ്ചസാര ഫാക്ടറികൾക്ക് മുന്നിൽ അനിശ്ചിതകാല പ്രക്ഷോഭത്തിലാണ്. തങ്ങളുടെ ആവശ്യങ്ങൾ അംഗീകരിക്കുന്നതുവരെ പഞ്ചസാര കടത്താൻ അനുവദിക്കില്ലെന്ന കടുത്ത നിലപാടിലാണ് കർഷക സമൂഹം.
അതേസമയം, മഹാരാഷ്ട്രയിൽ നിന്ന് പഞ്ചസാര എത്തിയാൽ വിപണിയിലെ പ്രതിസന്ധിക്ക് അയവു വരുമെന്ന പ്രതീക്ഷയിലാണ് മൊത്തവ്യാപാരികൾ. എന്നാൽ പഞ്ചസാരയുടെ വില വർധന വരാനിരിക്കുന്ന ദീപാവലി വിപണിയെയും ബാധിക്കുമെന്നും, മധുരപലഹാരങ്ങളുടെ വില കുതിച്ചുയരാൻ സാധ്യതയുണ്ടെന്നുമാണ് വിലയിരുത്തൽ.
