യൂറോപ്പിൽ ഫ്രീസർ സൈബർ ആക്രമണം: താപനില 50 ഡിഗ്രി ഉയർത്തി, ഭക്ഷണസാധനങ്ങൾ നശിപ്പിച്ചു
സ്റ്റോക്കോം: സ്വീഡൻ, ബെൽജിയം, ലക്സംബർഗ്, എസ്തോണിയ എന്നിവിടങ്ങളിലെ സൂപ്പർമാർക്കറ്റുകളെ ലക്ഷ്യമാക്കി തിങ്കളാഴ്ച നടന്ന സൈബർ ആക്രമണം വ്യാപകമായ നാശനഷ്ടങ്ങൾക്കു കാരണമായി. കടകളിലെ ഫ്രിജുകളുടെയും ഫ്രീസറുകളുടെയും താപനില അസാധാരണമാംവിധം ഉയർത്തിയതിലൂടെ വൻതോതിൽ ഭക്ഷ്യവസ്തുക്കൾ കേടായി നശിച്ചു. സമാനമായ രീതിയിൽ ഫ്രാൻസിലെ നൂറുകണക്കിന് വ്യാപാരസ്ഥാപനങ്ങളിലും സൂപ്പർമാർക്കറ്റുകളിലും കഴിഞ്ഞ മാസം ഹാക്കർമാർ ആക്രമണം നടത്തിയിരുന്നു.
സ്വീഡനിലെ പ്രമുഖ സൂപ്പർമാർക്കറ്റ് ശൃംഖലയായ ഐസിഎ ഗ്രൂപ്പിലെ ഏതാനും കടകളെയാണ് ഈ അട്ടിമറി ബാധിച്ചതെന്ന് കമ്പനി വക്താവ് സ്ഥിരീകരിച്ചു. ഫ്രീസറുകളിലെ താപനില 50 ഡിഗ്രി സെൽഷ്യസ് വരെ ഉയർന്നതായാണ് അധികൃതർ വെളിപ്പെടുത്തുന്നത്. ബെൽജിയം, ലക്സംബർഗ് എന്നിവിടങ്ങളിൽ ഡെൽഹൈസ് സ്റ്റോറുകളെ ലക്ഷ്യമിട്ടായിരുന്നു ആക്രമണം, ഇത് വിപണിയിൽ ഭക്ഷ്യ ഉൽപന്നങ്ങളുടെ ലഭ്യതയെ സാരമായി ബാധിച്ചു. ബെൽജിയത്തിലെ കാർഫൂർ സൂപ്പർമാർക്കറ്റുകളും ഹാക്കർമാരുടെ പിടിയിലായി.
എസ്തോണിയയിൽ കിറ്റ്‌മാൻ കോൾഡ്‌ടെക് എന്ന സ്ഥാപനത്തിന് നേരെയായിരുന്നു ആക്രമണമുണ്ടായത്. എങ്കിലും, താപനിലയിലെ വ്യതിയാനം വളരെ വേഗത്തിൽ കണ്ടെത്താനും മിനിറ്റുകൾക്കുള്ളിൽ തന്നെ അത് നിയന്ത്രിക്കാനും കമ്പനിക്ക് കഴിഞ്ഞു. അതിനാൽ വലിയ തോതിലുള്ള നാശനഷ്ടങ്ങൾ ഒഴിവാക്കാൻ സാധിച്ചതായി അധികൃതർ അറിയിച്ചു.
