ഭാര്യയ്ക്ക് ഭക്ഷണം നൽകി മടങ്ങവേ യുവാവിന് നേരെ ആക്രമണം: തടഞ്ഞുനിർത്തി മർദ്ദനം
തിരുവനന്തപുരം: പ്രസവാനന്തരം ചികിത്സയിലുള്ള ഭാര്യയ്ക്കായി ആശുപത്രിയിൽ ഭക്ഷണം എത്തിച്ചു മടങ്ങുന്നതിനിടെയാണ് നെയ്യാറ്റിൻകര മൺവിള സ്വദേശിയായ പ്രദീപിന് നേരെ ക്രൂരമായ ആക്രമണം ഉണ്ടായത്. അർധരാത്രി വീട്ടിലേക്ക് വാഹനം ഓടിച്ചുപോകുമ്പോഴായിരുന്നു സംഭവം. ആക്രമണത്തിൽ ഗുരുതരമായി പരിക്കേറ്റ പ്രദീപ് നിലവിൽ ആശുപത്രിയിൽ ചികിത്സയിലാണ്; നെഞ്ചിലും വയറിലും കയ്യിലും മുതുകിലുമായി സാരമായ വെട്ടേറ്റ പാടുകളുണ്ട്.
‘‘വീട്ടിൽ എത്തുന്നതിന് ഏകദേശം അര കിലോമീറ്റർ മാത്രം അകലെവെച്ചാണ് മൂന്നുപേർ റോഡിന് കുറുകെ നിൽക്കുന്നത് ശ്രദ്ധയിൽപ്പെട്ടത്. പെട്ടെന്ന് അവർ വാഹനം തടഞ്ഞുനിർത്തുകയും പുറത്തിറങ്ങാൻ നിർബന്ധിക്കുകയും ചെയ്തു. വാഹനം നിർത്തി പുറത്തിറങ്ങിയതും അവരുമായി വാക്കേറ്റമുണ്ടായി. ഒട്ടും വൈകാതെ അതിലൊരാൾ വാളെടുത്ത് വെട്ടുകയായിരുന്നു’’ – പ്രദീപ് ഓർക്കുന്നു.
‘‘ഒരാൾ എന്നെ കടന്നുപിടിച്ച് തടഞ്ഞുനിർത്തിയപ്പോൾ മറ്റുള്ളവർ ആയുധം കൊണ്ട് ആക്രമിക്കുകയായിരുന്നു. മൂന്നുപേർ ചേർന്ന് നടത്തിയ ആ ക്രൂരമായ മർദ്ദനത്തിൽ നിന്ന് കഷ്ടപ്പെട്ടാണ് ഞാൻ രക്ഷപ്പെട്ടത്. തക്കം നോക്കി അവിടെനിന്ന് ഓടി രക്ഷപ്പെടുകയായിരുന്നു. തൊട്ടടുത്തുള്ള അമ്പലത്തിൽ അഭയം തേടിയാണ് പൊലീസിനെയും സുഹൃത്തിനെയും വിവരമറിയിച്ചത്. സുഹൃത്ത് എത്തിയ ശേഷം അദ്ദേഹത്തോടൊപ്പമാണ് നെയ്യാറ്റിൻകര ആശുപത്രിയിൽ ചികിത്സ തേടിയത്. പിന്നീട് വീട്ടിലേക്ക് തിരിച്ചെത്തിയപ്പോൾ എന്റെ കാർ പൂർണ്ണമായി കത്തിനശിച്ച നിലയിലായിരുന്നു കണ്ടത്. ആരോടും ശത്രുതയില്ലാതെ കഴിയുന്ന എന്നെ എന്തിനാണ് ഇവർ ആക്രമിച്ചതെന്ന് അറിയില്ല. മുൻപരിചയമില്ലാത്തവരാണ് ഈ അക്രമം നടത്തിയത്. കുറ്റവാളികളെ എത്രയും വേഗം നിയമത്തിന് മുന്നിൽ കൊണ്ടുവന്ന് അർഹമായ ശിക്ഷ നൽകണം’’ – പ്രദീപ് ആവശ്യപ്പെട്ടു.
