കുഞ്ഞുങ്ങളെ സുരക്ഷിതരാക്കി യാത്രചെയ്യാം; ഈ നാലു കാറുകൾ റേറ്റിങ്ങിൽ മുന്നിൽ

ഒരു പുതിയ കാർ വാങ്ങുമ്പോൾ ധാരാളം കാര്യങ്ങൾക്ക് നാം പ്രാധാന്യം നൽകാറുണ്ട്. മൈലേജ്, സീറ്റിംഗ് കപ്പാസിറ്റി, സ്റ്റോറേജ് ഫെസിലിറ്റി തുടങ്ങി നിരവധി കാര്യങ്ങൾക്ക് പ്രാധാന്യം നൽകാറുണ്ട്. എന്നാൽ, പലപ്പോഴും സുരക്ഷയുടെ കാര്യത്തിൽ വിട്ടുവീഴ്ച ചെയ്യുന്നതാണ് പതിവ്. അതിൽ തന്നെ കുട്ടികളുടെ സുരക്ഷയെക്കുറിച്ച് പലരും ആലോചിക്കാറില്ല. സുരക്ഷാസൗകര്യങ്ങൾ വർദ്ധിക്കുന്നതിനനുസരിച്ച് വാഹനത്തിന്റെ നിരക്കിലുണ്ടാകുന്ന വർദ്ധനയാകാം അതിന് കാരണം. ഭാരത് എൻസിഎപി അനുസരിച്ച് കുട്ടികളുടെ സുരക്ഷയിൽ മുന്നിൽ നിൽക്കുന്ന നാല് കാറുകളുടെ പട്ടിക ഇതാ. 20 ലക്ഷം രൂപയിൽ താഴെ മാത്രമാണ് ഇവയുടെ വില.

കിയ സെൽറ്റോസ്

ഭാരത് എൻസിഎപിയുടെ റിപ്പോർട്ട് പ്രകാരം ഇന്ത്യൻ വിപണിയിൽ കിയ സെൽറ്റോസാണ് ഏറ്റവും സുരക്ഷിതമായ എസ്‌യുവി. കുട്ടികളുടെ സുരക്ഷയിൽ, സെൽറ്റോസ് 49 പോയിന്റുകളിൽ 45 പോയിന്റുകൾ നേടി. ഡൈനാമിക് ടെസ്റ്റിംഗിൽ ഇത് പൂർണ്ണമായി 24/24 ഉം കുട്ടികളുടെ നിയന്ത്രണ സംവിധാനത്തിന്റെ ഇൻസ്റ്റളേഷനിൽ 12/12 ഉം നേടി. 10.99 ലക്ഷം രൂപയിൽ നിന്നാണ് കിയ സെൽറ്റോസിന്റെ വില ആരംഭിക്കുന്നത്.

റെനോ ഡസ്റ്റർ
കുട്ടികളുടെ സുരക്ഷ ഉറപ്പാക്കുന്ന കാറുകളുടെ പട്ടികയിൽ റെനോ ഡസ്റ്ററാണ് രണ്ടാം സ്ഥാനത്തുള്ളത്. ഭാരത് എൻസിഎപി ക്രാഷ് ടെസ്റ്റിൽ റെനോ ഡസ്റ്ററിന് 5-സ്റ്റാർ സുരക്ഷാ റേറ്റിംഗ് ലഭിച്ചു. കുട്ടികളുടെ സുരക്ഷ ഉറപ്പാക്കുന്ന കാര്യത്തിൽ 49 പോയിന്റുകളിൽ 45 പോയിന്റുകളും ലഭിച്ചു. ഡൈനാമിക് മൂല്യനിർണ്ണയത്തിൽ ഇത് 24ൽ 24 പോയിന്റുകൾ നേടി. അപകടസാഹചര്യങ്ങളിൽ ഫലപ്രദമായ നിയന്ത്രണസംവിധാനങ്ങൾ എടുത്തുകാണിക്കുന്നു.

ടാറ്റ പഞ്ച്/ പഞ്ച് ഇവി
ഭാരത് എൻസിഎപി ക്രാഷ് ടെസ്റ്റിൽ ചൈൽഡ് ഒക്യുപന്റ് പ്രൊട്ടക്ഷനിൽ ടാറ്റ പഞ്ച് ഫെയ്‌സ്‌ലിഫ്റ്റും ടാറ്റ പഞ്ച് ഇവിയും 49 ൽ 45 പോയിന്റുകൾ നേടി. ഡൈനാമിക് ടെസ്റ്റുകളിൽ 24 ൽ 24 ഉം സിആർഎസ് ഇൻസ്റ്റാളേഷൻ ടെസ്റ്റുകളിൽ 12 ൽ 12 ഉം എസ്‌യുവി നേടി. ചൈൽഡ് സീറ്റുകൾ സുരക്ഷിതമായി ഘടിപ്പിക്കാൻ കഴിയുമെന്ന് സ്ഥിരീകരിച്ചു. 5.64 ലക്ഷം രൂപ മുതൽക്കാണ് ടാറ്റ പഞ്ചിന്റെ വില ആരംഭിക്കുന്നത്.

സ്കോഡ കൈലാഖ്

ഭാരത് എൻസിഎപി ക്രാഷ് ടെസ്റ്റിൽ സ്കോഡ കൈലാഖിന് 5-സ്റ്റാർ റേറ്റിംഗ് ലഭിച്ചു, കുട്ടികളുടെ സുരക്ഷയിൽ 45/49 സ്കോർ നേടി. 7.59 ലക്ഷം രൂപയിൽ നിന്നാണ് സ്കോഡ കൈലാഖ് എസ്‌യുവിയുടെ വില ആരംഭിക്കുന്നത്.