ഹൈദരാബാദിലെ വിവാഹച്ചന്ത: 5 ലക്ഷം രൂപയും 4 ദിവസവും; ഇടനിലക്കാരായി മലയാളികൾ
ഹൈദരാബാദ് കേന്ദ്രീകരിച്ച് നടക്കുന്ന വിവാഹക്കച്ചവടത്തിന്റെ ഞെട്ടിക്കുന്ന വിവരങ്ങളാണ് പുറത്തുവരുന്നത്. വെറും അഞ്ച് ലക്ഷം രൂപ കൈമാറിയാൽ നാല് ദിവസത്തിനുള്ളിൽ വധുവിനെ സ്വന്തമാക്കി നാട്ടിലേക്ക് മടങ്ങാം എന്ന വാഗ്ദാനവുമായി വൻ റാക്കറ്റാണ് ഇവിടെ പ്രവർത്തിക്കുന്നത്. ഹൈദരാബാദിൽ ഇത്തരത്തിൽ പെണ്ണുകിട്ടുമെന്നറിഞ്ഞ് എത്തുന്നവരിൽ ഭൂരിഭാഗവും മലയാളികളാണ് എന്നത് ഏറെ ഗൗരവകരമാണ്. ഇതിൽ രണ്ടാം വിവാഹമോ മൂന്നാം വിവാഹമോ ആഗ്രഹിക്കുന്നവരും ഗൾഫിൽ ജോലി ചെയ്യുന്ന മലയാളികളുമുണ്ട്. മനോരമ ന്യൂസ് പ്രിൻസിപ്പൽ കറസ്‌പോണ്ടന്റ് എസ്. മഹേഷ്കുമാറും സീനിയർ ക്യാമറമാൻ മുഹമ്മദ് ഷമീമും വലിയ വെല്ലുവിളികൾ നേരിട്ടുകൊണ്ട് നടത്തിയ അന്വേഷണാത്മക പരമ്പരയിലൂടെയാണ് ഈ കൊടുംചൂഷണം വെളിച്ചത്തുകൊണ്ടുവന്നത്.
സമൂഹമാധ്യമങ്ങളിൽ പ്രത്യക്ഷപ്പെട്ട ‘രണ്ടാം വിവാഹത്തിന് ഹൈദരാബാദിൽ പെൺകുട്ടികൾ റെഡി’ എന്ന പരസ്യമാണ് വാർത്താസംഘത്തെ ഈ ഞെട്ടിക്കുന്ന സത്യങ്ങളിലേക്ക് നയിച്ചത്. അന്വേഷണത്തിനായി എത്തിയ സംഘത്തെ അവിടെ സ്വീകരിച്ചത് ദുബായിൽ ബിസിനസുകാരനായ അറുപതുകാരന്റെ വിവാഹത്തിരക്കിലായിരുന്ന മലയാളി ഇടനിലക്കാരായിരുന്നു. കേവലം നാല് ദിവസം മാത്രം മതി, നിയമപരമായ കടമ്പകളെല്ലാം കഴിഞ്ഞ് പെൺകുട്ടിയുമായി മടങ്ങാൻ സാധിക്കുമെന്ന് ഇവർ ഉറപ്പുനൽകുന്നു. വെറും ഏഴ് മണിക്കൂർ കൊണ്ട് അഞ്ച് പെൺകുട്ടികളെയാണ് ഇവർ മുന്നിൽ ഹാജരാക്കിയത്. പതിനെട്ടിനും മുപ്പതിനും ഇടയിൽ പ്രായമുള്ള യുവതികളെയാണ് ഇവിടെ കച്ചവടച്ചരക്കാക്കുന്നത്. ഇഷ്ടപ്പെട്ട പെൺകുട്ടിക്കായി അവളുടെ പിതാവിന് അഞ്ച് ലക്ഷം രൂപയും ഇടനിലക്കാരന് ഒരു ലക്ഷം രൂപയും നൽകണമെന്നാണ് വ്യവസ്ഥ.
തിരഞ്ഞെടുത്ത പെൺകുട്ടിയെ ഉറപ്പിക്കാനായി ‘മൂമിട്ട’ എന്ന ചടങ്ങാണ് നടക്കുന്നത്. വരൻ വധുവിന് മിഠായി നൽകി വിവാഹം ഉറപ്പിക്കുന്ന രീതിയാണിത്. ഈ ചടങ്ങ് പൂർത്തിയായാൽ തൊട്ടടുത്ത ദിവസം തന്നെ നിക്കാഹ് നടത്തി പെൺകുട്ടിയുമായി എവിടേക്ക് വേണമെങ്കിലും പോകാമെന്നും ബ്രോക്കർമാർ വാഗ്ദാനം ചെയ്യുന്നു.
