HEALTH

ഫേസ് ക്രീം ഉപയോഗം: വൃക്ക മാറ്റിവെച്ച യുവാവിന്റെ വെളിപ്പെടുത്തൽ ഞെട്ടിക്കുന്നു

മലപ്പുറം: സൗന്ദര്യവർദ്ധക ക്രീമുകളുടെ ഉപയോഗത്തെത്തുടർന്ന് തനിക്ക് ഗുരുതരമായ വൃക്കരോഗം പിടിപെട്ടുവെന്ന വെളിപ്പെടുത്തലിന് പിന്നാലെ, സമാനമായ ദുരനുഭവങ്ങൾ നേരിട്ട നൂറുകണക്കിന് ആളുകളാണ് തനിക്ക് സന്ദേശങ്ങളയക്കുന്നതെന്ന് ഗായകൻ സലീം കോടത്തൂർ വ്യക്തമാക്കി. വൃക്ക മാറ്റിവെക്കൽ ശസ്ത്രക്രിയയ്ക്ക് വിധേയനായ 23 വയസ്സുള്ള യുവാവ് താൻ ഉപയോഗിച്ച ക്രീമിന്റെ ചിത്രം സലീമിന് അയച്ചു നൽകിയിരുന്നു. താൻ ഉപയോഗിച്ച ക്രീമാണ് തന്റെ അവയവങ്ങൾ തകരാറിലാക്കിയതെന്ന് ഈ യുവാവ് തിരിച്ചറിഞ്ഞത് ശസ്ത്രക്രിയയ്ക്ക് ശേഷമായിരുന്നു.

മെർക്കുറി അടങ്ങിയ ഫെയർനെസ് ക്രീം ഉപയോഗിച്ച് ഗുരുതരമായ ആരോഗ്യപ്രശ്നങ്ങളിലായ 17 വയസ്സുകാരി നിയമപോരാട്ടത്തിന് ഇറങ്ങിയ സാഹചര്യത്തിലാണ്, പത്ത് വർഷം മുൻപ് തനിക്കുണ്ടായ ദുരനുഭവം സലീം കോടത്തൂർ പരസ്യമാക്കിയത്. സമാന സാഹചര്യത്തിലൂടെ കടന്നുപോകുന്നവർക്ക് കരുത്തേകാൻ നിയമനടപടികളുമായി മുന്നോട്ട് പോകാനും അദ്ദേഹം തീരുമാനിച്ചിട്ടുണ്ട്.

‘പത്ത് വർഷം മുൻപ് നിറം വർദ്ധിപ്പിക്കുമെന്ന പരസ്യങ്ങൾ വിശ്വസിച്ചാണ് ഞാൻ ക്രീം ഉപയോഗിച്ചത്. രണ്ട് മാസം കൊണ്ട് ഒന്നര കുപ്പിയോളം ക്രീം ഞാൻ തീർത്തു. ആദ്യം കാലുകളിലും പിന്നാലെ കൺപോളകളിലും നീര് കണ്ടുതുടങ്ങി. മൂത്രത്തിൽ അണുബാധ അനുഭവപ്പെട്ടതിനെത്തുടർന്ന് ചികിത്സ തേടിയെങ്കിലും ഫലമുണ്ടായില്ല. തുടർന്നുള്ള പരിശോധനകളിൽ മൂത്രത്തിലൂടെ ആൽബുമിൻ നഷ്ടപ്പെടുന്നതായി കണ്ടെത്തി.’

നാല് മാസത്തെ ചികിത്സയ്ക്ക് ശേഷവും ഭേദമാകാതിരുന്ന അവസ്ഥയിൽ, രോഗം പൂർണ്ണമായി മാറാൻ വർഷങ്ങൾ വേണ്ടിവരുമെന്ന് ഡോക്ടർമാർ അറിയിച്ചിരുന്നു. എന്നാൽ, എട്ട് മാസത്തെ സ്റ്റിറോയിഡ് ചികിത്സയിലൂടെയാണ് ആരോഗ്യനില വീണ്ടെടുത്തത്. എങ്കിലും, ഇപ്പോഴും ഉറക്കമില്ലായ്മ പോലുള്ള ആരോഗ്യപ്രശ്നങ്ങൾ തന്നെ വേട്ടയാടുന്നുണ്ടെന്ന് അദ്ദേഹം പറഞ്ഞു. ക്രീം ഉപയോഗിച്ചിരുന്ന കാലത്ത് തുടർച്ചയായി 13 ദിവസത്തോളം ഉറങ്ങാൻ പോലും സാധിച്ചിരുന്നില്ല. ആരോഗ്യപ്രശ്നങ്ങൾ കാരണം ഒരു വർഷത്തോളം സംഗീതപരിപാടികൾ പലതും വേണ്ടെന്നുവെക്കേണ്ടി വന്നു. മാനസികവും സാമ്പത്തികവുമായ വലിയ തകർച്ചയാണ് ആ കാലയളവിൽ ഉണ്ടായതെന്ന് അദ്ദേഹം ഓർക്കുന്നു. സുഹൃത്തുക്കളുടെ പിന്തുണയാണ് ആ പ്രതിസന്ധിഘട്ടത്തിൽ സഹായകമായത്.

അസുഖം ഭേദമായെങ്കിലും ഇപ്പോഴും മരുന്നുകളുടെ കാര്യത്തിൽ വലിയ ജാഗ്രത പാലിക്കേണ്ടതുണ്ട്. പെയിൻ കില്ലറുകൾ ഉപയോഗിക്കുന്നതിൽ ഉൾപ്പെടെ നിയന്ത്രണങ്ങളുണ്ട്. പുതിയ ഏത് അസുഖത്തിന് ചികിത്സ തേടുമ്പോഴും, മുൻപ് ചെയ്തിട്ടുള്ള ബയോപ്സി റിപ്പോർട്ടുകൾ പരിശോധിച്ച ശേഷമേ ഡോക്ടർമാർ മരുന്ന് നിർദ്ദേശിക്കാറുള്ളൂ.

അന്ന് തന്നോടൊപ്പം നാല് സുഹൃത്തുക്കളും ഇതേ ക്രീം ഉപയോഗിച്ചിരുന്നു. അവരിൽ ഒരാൾക്ക് ആറുമാസത്തിന് ശേഷമാണ് രോഗലക്ഷണങ്ങൾ കണ്ടുതുടങ്ങിയത്. ആ അനുഭവത്തിന് ശേഷമാണ് ക്രീമിന്റെ അമിത ഉപയോഗമാണ് വില്ലനെന്ന് തിരിച്ചറിഞ്ഞത്. നേരത്തെ രോഗം തിരിച്ചറിഞ്ഞതിനാൽ അവർക്ക് വേഗത്തിൽ സുഖപ്പെടാൻ കഴിഞ്ഞു. ചിലരിൽ വർഷങ്ങൾക്കിപ്പുറം മാത്രമാണ് ആരോഗ്യപ്രശ്നങ്ങൾ പുറത്തുവരുന്നത്.

വിപണിയിൽ വ്യത്യസ്ത പേരുകളിൽ ഇത്തരം അപകടകരമായ ക്രീമുകൾ യഥേഷ്ടം ലഭ്യമാണ്. ഫാൻസി സ്റ്റോറുകളിലും ഓൺലൈൻ പ്ലാറ്റ്‌ഫോമുകളിലും ഇത്തരം ഉൽപ്പന്നങ്ങൾ സുലഭമാണ്. ചിലർ മൊത്തമായി ക്രീം വാങ്ങി പാക്കിംഗ് മാറ്റി സ്വന്തം ബ്രാൻഡിൽ വിൽക്കുന്നുണ്ട്. വിദേശങ്ങളിൽ നിന്ന് സമ്മാനമായി എത്തുന്ന പാക്കറ്റുകളിലും ഇത്തരം മാരക ക്രീമുകൾ കണ്ടുവരാറുണ്ട്.

രണ്ട് വർഷം മുൻപ് സമാനമായ ആരോഗ്യപ്രശ്നങ്ങൾ വാർത്തയായപ്പോൾ പ്രതികരിക്കാതിരുന്നത് തെറ്റായിപ്പോയെന്ന് സലീം കരുതുന്നു. ഇപ്പോൾ 17കാരിയുടെ അനുഭവം പുറത്തുവന്നതോടെയാണ് തന്റെ കാര്യങ്ങൾ തുറന്നുപറയാൻ തീരുമാനിച്ചത്. എന്നാൽ, വെളിപ്പെടുത്തലിന് പിന്നാലെ ചിലർ പരിഹസിച്ചപ്പോൾ സത്യം പറഞ്ഞത് അബദ്ധമായോ എന്ന് താൻ പോലും ചിന്തിച്ചുപോയെന്ന് അദ്ദേഹം തുറന്നുപറഞ്ഞു.

നിയമനടപടികളിലൂടെ നീതി ലഭിക്കുമെന്ന പ്രതീക്ഷയിലാണ് അദ്ദേഹം. താൻ അനുഭവിച്ച ദുരവസ്ഥ മറ്റാർക്കും ഉണ്ടാകരുതെന്ന ആഗ്രഹത്തോടെയാണ് കേസിന് തയ്യാറെടുക്കുന്നത്. പരാതിക്കാരിയായ പെൺകുട്ടിക്കും തന്നോട് സഹായം അഭ്യർത്ഥിക്കുന്നവർക്കും പിന്തുണ നൽകാനാണ് കേസ് ഫയൽ ചെയ്യുന്നതെന്ന് സലീം കോടത്തൂർ വ്യക്തമാക്കി.

Life Style ⏭️

Back to top button