ശബരി റെയിൽ പദ്ധതി: സിൽവർ ലൈൻ ഓഫിസുകൾ ഏറ്റെടുക്കാനുള്ള റവന്യു നിർദേശം നടപ്പായില്ല
തിരുവനന്തപുരം∙ സിൽവർ ലൈൻ പദ്ധതിക്കായി അനുവദിച്ച ഭൂമി ഏറ്റെടുക്കൽ ഓഫിസുകളും ജീവനക്കാരുടെ തസ്തികകളും അങ്കമാലി–എരുമേലി ശബരി റെയിൽവേ പദ്ധതിക്ക് വിനിയോഗിക്കണമെന്ന റവന്യു വകുപ്പിന്റെ നിർദേശം ഇപ്പോഴും കടലാസിൽ തന്നെ. ഇതുമായി ബന്ധപ്പെട്ട് റവന്യു വകുപ്പ് ലാൻഡ് റവന്യു കമ്മിഷണർക്ക് ആറു തവണ കത്തുകൾ അയച്ചിട്ടും കാര്യമായ പുരോഗതിയൊന്നും ഉണ്ടായിട്ടില്ലെന്നതാണ് വസ്തുത.
എറണാകുളം, കോട്ടയം, ഇടുക്കി ജില്ലകളിലായി ഭൂമി ഏറ്റെടുക്കുന്നതിനായുള്ള ഓഫിസുകൾ എത്രയും വേഗം പ്രവർത്തനസജ്ജമാക്കണമെന്ന ആവശ്യം ശക്തമാണ്. ഇക്കാര്യം ആവശ്യപ്പെട്ട് ഡീൻ കുര്യാക്കോസ് എംപി സമർപ്പിച്ച നിവേദനങ്ങളുടെ അടിസ്ഥാനത്തിൽ റവന്യു വകുപ്പ് അയച്ച കത്തുകളിലും ഈ വിഷയം ഗൗരവമായി ഉന്നയിച്ചിരുന്നു. ശബരി പാതയുടെ നിർമാണച്ചെലവിന്റെ പകുതി തുക സംസ്ഥാനം വഹിക്കുന്നതുമായി ബന്ധപ്പെട്ട ഫയൽ നിലവിൽ ധനവകുപ്പിന്റെ പരിഗണനയിലാണ്. നിലവിലെ സാഹചര്യത്തിൽ കിഫ്ബി മുഖേന ഫണ്ട് സമാഹരിക്കുക പ്രായോഗികമല്ലാത്തതിനാൽ, ബദൽ മാർഗങ്ങളെക്കുറിച്ച് സർക്കാർ ചിന്തിക്കേണ്ടി വരും.
സംസ്ഥാനത്തിന്റെ വിഹിതമായി 1900 കോടി രൂപയാണ് കണ്ടെത്തേണ്ടത്. ഈ തുക ഗഡുക്കളായി നൽകാൻ സൗകര്യമുണ്ടെങ്കിലും, അത്തരം സാധ്യതകൾ പ്രയോജനപ്പെടുത്തുന്നതിനെക്കുറിച്ച് ഗൗരവമായ പരിശോധനകൾ സർക്കാർ തലത്തിൽ നടന്നിട്ടില്ല.
