ദേശീയ ചലച്ചിത്ര പുരസ്‌കാരം: എം.ടിയുടെ മകൾ അശ്വതിക്ക് അംഗീകാരം
ന്യൂഡൽഹി: പ്രശസ്ത സാഹിത്യകാരൻ എം.ടി. വാസുദേവൻ നായരുടെ പുത്രിയും പ്രമുഖ നർത്തകിയുമായ അശ്വതി വി.നായർക്ക് ഡോ. മംഗളം സ്വാമിനാഥൻ ദേശീയ മികവ് പുരസ്‌കാരം ലഭിച്ചു. ഭരതനാട്യം, മോഹിനിയാട്ടം, കുച്ചിപ്പുടി തുടങ്ങിയ കലാരൂപങ്ങളിലെ അസാമാന്യ പ്രാവീണ്യം മുൻനിർത്തി കലാ-സാംസ്‌കാരിക മേഖലയിലെ മികച്ച സംഭാവനയ്ക്കാണ് അശ്വതിയെ ഈ പുരസ്‌കാരത്തിനായി തിരഞ്ഞെടുത്തത്.
മാധ്യമരംഗത്തെ മികവിനുള്ള പുരസ്‌കാരം ജന്മഭൂമി സീനിയർ സബ് എഡിറ്റർ വിനീത വേണാട്ട് സ്വന്തമാക്കി. ശാസ്ത്ര വിഷയങ്ങളെ ആസ്പദമാക്കിയുള്ള റിപ്പോർട്ടിംഗിലെ മികവിനാണ് അമൃത ടി.വിയിലെ സീനിയർ പ്രൊഡ്യൂസറായ ശ്രീദേവി ജി.ആറിനെ പുരസ്‌കാരത്തിന് അർഹയാക്കിയത്. കൂടാതെ, വൈദ്യശാസ്ത്ര രംഗത്ത് നടക്കുന്ന അഴിമതികളും ക്രമക്കേടുകളും തുറന്നുകാട്ടിയതിന് കേസരി വാരികയുടെ പത്രാധിപർ ഡോ. എൻ.ആർ. മധുവിനെയും പുരസ്‌കാരം നൽകി ആദരിക്കും.
വ്യത്യസ്തങ്ങളായ മേഖലകളിൽ നിന്നായി തിരഞ്ഞെടുക്കപ്പെട്ട പത്തുപേർക്കാണ് ഇത്തവണത്തെ പുരസ്‌കാരങ്ങൾ സമ്മാനിക്കുന്നത്. ഒരു ലക്ഷം രൂപയും ഫലകവും പ്രശസ്തിപത്രവും അടങ്ങുന്നതാണ് പുരസ്‌കാരം. ഈ മാസം 29-ന് വൈകിട്ട് നാല് മണിക്ക് ന്യൂഡൽഹിയിലെ എൻ.ഡി.എം.സി കൺവെൻഷൻ സെന്ററിൽ വെച്ച് നടക്കുന്ന വർണ്ണാഭമായ ചടങ്ങിൽ പുരസ്‌കാരങ്ങൾ വിതരണം ചെയ്യും.
ആർ.എസ്.എസ് സർകാര്യവാഹ് ദത്താത്രേയ ഹൊസബലെ ചടങ്ങിൽ മുഖ്യാതിഥിയായി പങ്കെടുക്കും. കേന്ദ്രമന്ത്രി ശ്രീപദ് നായിക്, സ്വാമി ആനന്ദവനം ഭാരതി മഹാരാജ് എന്നിവർ വിശിഷ്ടാതിഥികളായി എത്തും. ഫൗണ്ടേഷൻ ചെയർമാനും മാനേജിംഗ് ട്രസ്റ്റിയുമായ ഡോ. ആർ. ബാലശങ്കറാണ് പുരസ്‌കാര ജേതാക്കളെ ഔദ്യോഗികമായി പ്രഖ്യാപിച്ചത്.
