കെ.എസ്.ആർ.ടി.സിയിലേക്ക് 1000 സ്വകാര്യ ബസുകൾ: കിലോമീറ്ററിന് 55 രൂപ നിരക്ക് ആവശ്യപ്പെട്ട് ഉടമകൾ
പ്രതീകാത്മക ചിത്രം
തിരുവനന്തപുരം: സംസ്ഥാനത്തെ പൊതുഗതാഗത സംവിധാനത്തെ ശക്തിപ്പെടുത്തുന്നതിന്റെ ഭാഗമായി സ്വകാര്യ ബസുകളെ കൂടി കെ.എസ്.ആർ.ടി.സിയുടെ കുടക്കീഴിൽ കൊണ്ടുവരാൻ ഗതാഗതവകുപ്പിന്റെ നീക്കം.
ആദ്യഘട്ടമെന്ന നിലയിൽ 1000 ബസുകൾ കെ.എസ്.ആർ.ടി.സി ഏറ്റെടുക്കും. സാധാരണ സർവീസുകളായി ഇവ ഓടുമെങ്കിലും, പ്രിയദർശിനി ബസുകളുടെ ഗണത്തിൽ ഇവയെ ഉൾപ്പെടുത്തില്ല. വെറ്റ് ലീസ് (Wet Lease) എന്ന പ്രത്യേക കരാർ വ്യവസ്ഥയിലായിരിക്കും ബസുകൾ കൈമാറുക. ഭാവിയിൽ ഘട്ടംഘട്ടമായി സംസ്ഥാനത്തെ മുഴുവൻ സ്വകാര്യ ബസുകളെയും കെ.എസ്.ആർ.ടി.സിയുടെ ഭാഗമാക്കാനാണ് അധികൃതരുടെ പദ്ധതി.
പ്രിയദർശിനി സർവീസുകൾ മൂലം പ്രതിസന്ധിയിലായ സ്വകാര്യ ബസ് ഉടമകളെ സംരക്ഷിക്കുക എന്ന ലക്ഷ്യത്തോടെയാണ് ഈ വെറ്റ് ലീസ് പദ്ധതി ആവിഷ്കരിച്ചിരിക്കുന്നത്. ബസുടമകളുടെ സംഘടനയുമായി നടത്തിയ ചർച്ചയിൽ മന്ത്രി സി.പി. ജോൺ ആണ് ഇക്കാര്യം വ്യക്തമാക്കിയത്. കെ.എസ്.ആർ.ടി.സിക്കും ബസ് ഉടമകൾക്കും ഒരുപോലെ നേട്ടമുണ്ടാകുന്ന രീതിയിലാണ് പദ്ധതി വിഭാവനം ചെയ്തിരിക്കുന്നത്. ധാരണ പ്രകാരം, തെക്കൻ ജില്ലകളിൽ സർവീസ് നടത്തുന്ന 1000 ബസുകളുടെ പട്ടിക പ്രൈവറ്റ് ബസ് ഓപ്പറേറ്റേഴ്‌സ് ഫെഡറേഷൻ ഇതിനകം തയ്യാറാക്കി കഴിഞ്ഞു. വാടക തുക സംബന്ധിച്ച അന്തിമ തീരുമാനമെത്തിയാൽ ഉടൻ തന്നെ ബസുകൾ കൈമാറും.
കിലോമീറ്ററിന് 55 രൂപ നിരക്കിൽ വാടക വേണമെന്നാണ് ബസ് ഉടമകളുടെ സംഘടനയുടെ ആവശ്യം. എന്നാൽ 50 രൂപ നൽകാമെന്ന നിലപാടാണ് ഗതാഗതവകുപ്പ് സ്വീകരിച്ചിരിക്കുന്നത്. വാടക തുക ആഴ്ചതോറും നൽകണമെന്ന ഉടമകളുടെ ആവശ്യം ഗതാഗതവകുപ്പ് അംഗീകരിച്ചിട്ടുണ്ട്. ബസുകൾ ലഭ്യമാകുന്ന മുറയ്ക്ക് കെ.എസ്.ആർ.ടി.സി നിലവിലെ സർവീസ് സമയക്രമങ്ങളിൽ മാറ്റം വരുത്തും. കോവിഡിന് മുൻപ് നിർത്തിവെച്ച സർവീസുകൾ ഇതോടെ വീണ്ടും തുടങ്ങാൻ സാധിക്കും.
അതേസമയം, പ്രിയദർശിനി സർവീസുകൾ വർദ്ധിപ്പിക്കുന്ന കാര്യത്തിൽ ഇതുവരെ തീരുമാനമായിട്ടില്ല. ദീർഘദൂര സർവീസ് നടത്തുന്ന സ്വകാര്യ ബസുകൾ നിലവിൽ ലിമിറ്റഡ് സ്റ്റോപ്പ് ഓർഡിനറി എന്ന നിലയിലാണ് പ്രവർത്തിക്കുന്നത്. ഇവ കെ.എസ്.ആർ.ടി.സി ഏറ്റെടുക്കുമ്പോൾ ഫാസ്റ്റ് പാസഞ്ചർ സർവീസുകളായി മാറിയേക്കും.
വെറ്റ് ലീസ് വ്യവസ്ഥയുടെ പ്രത്യേകതകൾ:
നിശ്ചിത തുക വാടകയായി ബസുടമകൾക്ക് നൽകും.
കണ്ടക്ടർമാരെ നിയമിക്കുന്നത് കെ.എസ്.ആർ.ടി.സി ആയിരിക്കും.
ബസിന്റെ ഡ്രൈവറെ നിശ്ചയിക്കാനുള്ള അധികാരം ഉടമയ്ക്കാണ്.
ഡീസൽ ചെലവുകൾ അടക്കമുള്ള ബാധ്യതകൾ ബസ് ഉടമ വഹിക്കണം.
പുതിയ പദ്ധതിയിലൂടെയുള്ള നേട്ടങ്ങൾ:
പുതിയ ബസുകൾ വാങ്ങുന്നതിനായി ചെലവാക്കുന്ന വൻ തുക സർക്കാരിന് ലാഭിക്കാം.
യാത്രാ നിരക്കുകൾ, വിദ്യാർത്ഥികളുടെ കൺസെഷൻ നിരക്ക് എന്നിവ കൂടുതൽ സുതാര്യമായും ന്യായമായും തീരുമാനിക്കാം.
വരുമാനത്തെക്കുറിച്ചുള്ള ആശങ്കകൾ ഇനി ബസുടമകളെ വേട്ടയാടില്ല.
നിരത്തുകളിലെ മൽസരയോട്ടത്തിന് ഇതോടെ വിരാമമാകും.
ബസുകളുടെ കണക്കെടുപ്പ്:
കെ.എസ്.ആർ.ടി.സി ബസുകൾ: 5,765
നിലവിൽ സർവീസ് നടത്തുന്നത്: 4,468
സ്വകാര്യ ബസുകൾ: 12,000
നിലവിൽ സർവീസ് നടത്തുന്നത്: 8,200
