മുൻ എംഎൽഎ എ.കെ.മണി അപകടത്തിൽപെട്ടത് സത്യപ്രതിജ്ഞച്ചടങ്ങിന് പോകുമ്പോൾ

മൂന്നാർ / കോന്നി ∙ യുഡിഎഫ് മന്ത്രിസഭയുടെ സത്യപ്രതിജ്ഞച്ചടങ്ങിൽ പങ്കെടുക്കാനായി മൂന്നാറിൽനിന്നു തിരുവനന്തപുരത്തേക്കുപോയ മുൻ ദേവികുളം എംഎൽഎ എ.കെ.മണിയടക്കമുള്ളവർ സഞ്ചരിച്ച വാഹനം പത്തനംതിട്ട കോന്നിക്കു സമീപം അപകടത്തിൽപെട്ടു; എ.കെ.മണി അടക്കം 4 പേർക്കു നിസ്സാര പരുക്കേറ്റു. മൂന്നാർ പഞ്ചായത്ത് പ്രസിഡന്റ് എസ്.വിജയകുമാർ, ബ്ലോക്ക് പഞ്ചായത്തംഗം ആർ.രാജാറാം, ഡ്രൈവർ മുനിയാണ്ടി എന്നിവരാണു പരുക്കേറ്റ മറ്റുള്ളവർ. പുനലൂർ – മൂവാറ്റുപുഴ സംസ്ഥാനപാതയിൽ തിങ്കൾ പുലർച്ചെ 2.10ന് ആണു സംഭവം. എലിയറയ്ക്കൽ ശാന്തി തിയറ്ററിനു മുൻപിലെ വൈദ്യുതത്തൂണിലേക്ക്, ഇവർ സഞ്ചരിച്ച ജീപ്പ് നിയന്ത്രണംവിട്ട് ഇടിച്ചുകയറുകയായിരുന്നു. ജീപ്പിന്റെ പിൻചക്രം പങ്‌ചറായതാണ് അപകടകാരണമെന്നാണു വിവരം. മൂന്നാർ പഞ്ചായത്തിന്റെ ഔദ്യോഗിക വാഹനമാണ് അപകടത്തിൽപെട്ടത്.


Source link