പൊലീസിനെ കണ്ടതോടെ ഓടാൻ ശ്രമിച്ചു; വിൽപനയ്ക്ക് പാക്കറ്റുകളാക്കി സൂക്ഷിച്ച കഞ്ചാവുമായി യുവാവ് പിടിയിൽ

കോഴിക്കോട്∙ വിൽപനക്കായി സൂക്ഷിച്ച കഞ്ചാവുമായി യുവാവ് പിടിയിൽ. 930 ഗ്രാം കഞ്ചാവുമായി ഒളവണ്ണ കയറ്റി സ്വദേശി മദീന മൻസിൽ മുഷാരിദ്(46) ആണ് നല്ലളം പൊലീസിന്റെ പിടിയിലായത്. ചൊവ്വാഴ്ച രാത്രി നല്ലളം പൊലീസിന്റെ പട്രോളിങ് ഡ്യൂട്ടിക്കിടയിൽ കയറ്റി എന്ന സ്ഥലത്ത് വച്ച് നടന്നു വരികയായിരുന്ന പ്രതി പൊലീസ് വാഹനം കണ്ട് ഓടിപ്പോകാൻ ശ്രമിച്ചു. ഇതേ തുടർന്ന് പൊലീസ് ഇറങ്ങി തടഞ്ഞു വച്ച് ചോദ്യം ചെയ്തതിൽ പ്രതി പരിഭ്രമിക്കുകയും തുടർന്ന് പൊലീസ് നടത്തിയ പരിശോധനയിൽ വിൽപനയ്ക്കായി 15 പാക്കറ്റുകളാക്കി സൂക്ഷിച്ച കഞ്ചാവ്കണ്ടെടുക്കുകയായിരുന്നു. നല്ലളം പൊലീസ് സ്റ്റേഷൻ സബ് ഇൻസ്പെക്ടർമാരായ ആനന്ദ്, വർഷ മധു, സിവിൽ പൊലീസ് ഓഫിസർ അനീഷ് എന്നിവർ ചേർന്നാണ് പ്രതിയെ കസ്റ്റഡിയിൽ എടുത്തത്.


Source link