ജപ്പാനിൽ മണിക്കൂറുകളുടെ വ്യത്യാസത്തിൽ രണ്ട് ഭൂചലനം; ജാഗ്രത പാലിക്കണമെന്ന് മുന്നറിയിപ്പ്

ടോക്കിയോ: ജപ്പാനിലെ വടക്കൻ ദ്വീപായ ഹൊക്കൈഡോയിൽ തിങ്കളാഴ്ച പുലർച്ചെ ശക്തമായ ഭൂചലനം അനുഭവപ്പെട്ടു. റിക്ടർ സ്‌കെയിലിൽ 6.2 തീവ്രത രേഖപ്പെടുത്തിയ ഭൂചലനത്തെത്തുടർന്ന് സുനാമി മുന്നറിയിപ്പുകളൊന്നും പുറപ്പെടുവിച്ചിട്ടില്ലെന്ന് ജപ്പാൻ കാലാവസ്ഥാ നിരീക്ഷണ ഏജൻസി അറിയിച്ചു. തിങ്കളാഴ്ച പ്രാദേശിക സമയം പുലർച്ചെ 5:23-ഓടെയാണ് ഭൂചലനമുണ്ടായത്. ഹൊക്കൈഡോയുടെ തെക്കൻ മേഖലയിൽ ഭൂമിക്കടിയിൽ 83 കിലോമീറ്റർ ആഴത്തിലാണ് ഭൂചലനത്തിന്റെ പ്രഭവകേന്ദ്രമെന്ന് യുഎസ് ജിയോളജിക്കൽ സർവേ പറഞ്ഞു. ജനവാസം കുറഞ്ഞ മേഖലയായതിനാൽ കെട്ടിടങ്ങൾക്കോ മറ്റ് വസ്തുവകകൾക്കോ വലിയ നാശനഷ്ടങ്ങൾ സംഭവിക്കാനോ ജീവഹാനിക്കോ സാധ്യത കുറവാണെന്ന് യുഎസ് ജിയോളജിക്കൽ സർവേ വിലയിരുത്തി.ഭൂചലനത്തെത്തുടർന്ന് ശക്തമായ കുലുക്കം അനുഭവപ്പെട്ട പ്രദേശങ്ങളിൽ പാറകൾ വീഴുന്നതിനും ഉരുൾപൊട്ടലിനുമുള്ള സാധ്യത വർധിച്ചതായി കാലാവസ്ഥാ നിരീക്ഷണ ഏജൻസി ഉദ്യോഗസ്ഥർ വാർത്താസമ്മേളനത്തിൽ അറിയിച്ചു. കൂടാതെ, വരും ആഴ്ചകളിൽ ഇതേ തീവ്രതയുള്ള തുടർച്ചലനങ്ങൾ ഉണ്ടാകാൻ സാധ്യതയുണ്ടെന്നും ജനങ്ങൾ ജാഗ്രത പാലിക്കണമെന്നും മുന്നറിയിപ്പുണ്ട്.ഈ ഭൂചലനത്തിന് മണിക്കൂറുകൾക്ക് മുമ്പ് ഹൊക്കൈഡോയ്ക്ക് നൂറുകണക്കിന് കിലോമീറ്റർ തെക്ക് കടലിൽ 5.0 തീവ്രതയുള്ള മറ്റൊരു ഭൂചലനവും റിപ്പോർട്ട് ചെയ്തിരുന്നു. കഴിഞ്ഞ തിങ്കളാഴ്ച വടക്കൻ ഇവാത്തെ പ്രവിശ്യയിൽ ഉണ്ടായ 7.7 തീവ്രതയുള്ള ഭൂചലനത്തിന് പിന്നാലെ രാജ്യത്ത് വലിയ ഭൂചലനങ്ങൾക്ക് സാധ്യതയുണ്ടെന്ന് ഏജൻസി നേരത്തെ മുന്നറിയിപ്പ് നൽകിയിരുന്നു. ഇവാത്തെയിലുണ്ടായ ഭൂചലനത്തിൽ ആറ് പേർക്ക് പരിക്കേൽക്കുകയും തീരപ്രദേശങ്ങളിൽ 80 സെന്റീമീറ്റർ വരെ ഉയരത്തിൽ ചെറിയ സുനാമി തിരമാലകൾ അടിക്കുകയും ചെയ്തിരുന്നു.നാല് പ്രധാന ടെക്‌റ്റോണിക് പ്ലേറ്റുകൾക്ക് മുകളിൽ പസഫിക് ‘റിംഗ് ഓഫ് ഫയർ’ മേഖലയിൽ സ്ഥിതി ചെയ്യുന്ന ജപ്പാൻ ലോകത്തിലെ ഏറ്റവും കൂടുതൽ ഭൂചലന സാധ്യതയുള്ള രാജ്യങ്ങളിൽ ഒന്നാണ്. പ്രതിവർഷം ശരാശരി 1,500-ഓളം ഭൂചലനങ്ങൾ ഇവിടെ അനുഭവപ്പെടാറുണ്ട്. 2011-ൽ ഉണ്ടായ 9.0 തീവ്രതയുള്ള ഭൂചലനവും സുനാമിയും രാജ്യത്ത് വലിയ നാശനഷ്ടങ്ങൾ വരുത്തിയിരുന്നു. നിലവിലെ സാഹചര്യം അധികൃതർ സൂക്ഷ്മമായി നിരീക്ഷിച്ചു വരികയാണ്.


Source link