ഡിഎംകെയുടെ ശക്തികേന്ദ്രത്തിലേക്ക് വിജയ്; പെരമ്പൂരിൽ മത്സരിക്കും? പ്രമേയം പാസാക്കി ടിവികെ

ചെന്നൈ: ടിവികെ സംസ്ഥാന പ്രസിഡന്റ് നടൻ വിജയ് വരുന്ന നിയമസഭാ തിരഞ്ഞെടുപ്പിൽ പെരമ്പൂർ നിയോജകമണ്ഡലത്തിൽ നിന്ന് മത്സരിച്ചേക്കും. 2021ൽ 54,976 വോട്ടിന് ഡിഎംകെ ജയിച്ച മണ്ഡലമാണിത്. ചെന്നൈയിൽ ഇന്ന് നടന്ന ടിവികെ യോഗത്തിൽ ഇക്കാര്യം ആവശ്യപ്പെട്ടുകൊണ്ടുള്ള പ്രമേയം പാസാക്കി. യോഗത്തെ അഭിസംബോധന ചെയ്തുകൊണ്ട് ടിവികെ തിരഞ്ഞെടുപ്പ് പ്രചാരണ മാനേജ്‌മെന്റ് സെക്രട്ടറി ആധവ് അർജുന പ്രമേയം അവതരിപ്പിച്ചു. കേഡർമാരുടെ അഭ്യർത്ഥന നേതൃത്വത്തെ അറിയിക്കുമെന്ന് പാർട്ടി ജനറൽ സെക്രട്ടറി എൻ ആനന്ദ് വ്യക്തമാക്കി.

ആധവ് അവതരിപ്പിച്ച പ്രമേയം ഞങ്ങൾ പൂർണ്ണഹൃദയത്തോടെ അംഗീകരിക്കുന്നുവെന്നും അണികളുടെ ആഗ്രഹം വിജയിയെ അറിയിക്കുമെന്നും അദ്ദേഹം പറഞ്ഞു. ഉയർന്ന ദാരിദ്ര്യവും കൂടുതൽ പൊതുജന ആവശ്യങ്ങളും നേരിടുന്ന പ്രദേശങ്ങളിൽ നിന്ന് മത്സരിക്കുന്നതിൽ പാർട്ടി നേതൃത്വം വിശ്വസിക്കുന്നുണ്ടെന്ന് ആധവ് പറഞ്ഞു. വടക്കൻ ചെന്നൈ അത്തരം സാഹചര്യങ്ങളെ പ്രതിഫലിപ്പിക്കുന്നുവെന്നും പെരമ്പൂർ, കൊളത്തൂർ, ആർകെ നഗർ പോലുള്ള വടക്കൻ ചെന്നൈ മണ്ഡലത്തിൽ നിന്ന് മത്സരിക്കുന്നതിനാണ് വിജയ് മുൻഗണന നൽകുന്നതെന്നും അദ്ദേഹം കൂട്ടിച്ചേർത്തു

‘ഹാർബർ മണ്ഡലത്തിൽ സമാധാനപരമായി പ്രചാരണം നടത്തിയിരുന്ന ടിവികെ പ്രവർത്തകർക്ക് നേരെയുണ്ടായ ആക്രമണങ്ങൾ കാരണമാണ് വിജയ് വടക്കൻ ചെന്നൈയിലെ രാഷ്ട്രീയ രംഗത്തേക്ക് പ്രവേശിക്കാൻ തീരുമാനിച്ചത്. ചെന്നൈ തങ്ങളുടെ രാഷ്ട്രീയ ശക്തികേന്ദ്രമാണെന്ന ഡിഎംകെ അവകാശം തിരുത്തുന്നതിനായാണ് തങ്ങൾ നഗരത്തിൽ പ്രചാരണം നടത്തുന്നത്. ഇനി മുതൽ ചെന്നൈ ടിവികെയുടേതാണ്’- അദ്ദേഹം പറഞ്ഞു.