വിജയിച്ചെന്ന് ട്രംപ്; പ്രസംഗം ട്രൂത്ത് സോഷ്യൽ പോസ്റ്റുകളുടെ ആവർത്തനമെന്ന് വിലയിരുത്തൽ

വാഷിങ്ടൻ ∙ യുഎസ് യുദ്ധം വിജയിച്ചുവെന്നും ഇറാനെ തകർത്തുവെന്നുമുള്ള ഡോണൾഡ് ട്രംപിന്റെ പ്രസംഗം പ്രധാനമായും അദ്ദേഹത്തിന്റെ ട്രൂത്ത് സോഷ്യൽ പോസ്റ്റുകളുടെ ആവർത്തനമായിരുന്നുവെന്ന് വിലയിരുത്തൽ. 19 മിനിറ്റോളം നീണ്ടുനിന്ന പ്രസംഗത്തിൽ പുതിയ നയങ്ങളൊന്നും ഉൾപ്പെടുത്തിയിരുന്നില്ല. ഇറാന്റെ പുതിയ ഭരണകൂടം വെടിനിർത്തലിനായി അപേക്ഷിച്ചു എന്നതും, അവരെ ശിലായുഗത്തിലേക്ക് മടക്കുമെന്നതുമായ മുൻ പോസ്റ്റുകളിലെ ഭീഷണികൾ അദ്ദേഹം ഈ പ്രസംഗത്തിലും ആവർത്തിച്ചു. ഇറാനെതിരെയുള്ള കടുത്ത ഭീഷണികളും സഖ്യകക്ഷികൾക്കെതിരായ വിമർശനങ്ങളും സമൂഹമാധ്യമത്തിൽ പങ്കുവച്ച അതേ രീതിയിലാണ് അദ്ദേഹം പ്രസംഗത്തിലും ആവർത്തിച്ചത്. സഖ്യകക്ഷികൾക്കിടയിലെ അസ്വാരസ്യങ്ങളെക്കുറിച്ചും പ്രസംഗത്തിൽ സൂചനയുണ്ടായിരുന്നു. പശ്ചിമേഷ്യൻ സംഘർഷം അവസാനിച്ചാൽ ഉടൻ നാറ്റോയിൽ നിന്ന് പിന്മാറുന്ന കാര്യം യുഎസ് പരിഗണിക്കുന്നതായി റിപ്പോർട്ടുകളുണ്ട്. പ്രസംഗത്തിനു മുന്നോടിയായും ശേഷവും സാമ്പത്തിക വിപണികളിൽ വലിയ മാറ്റങ്ങൾ പ്രകടമായി. സംഘർഷം കുറയുമെന്ന പ്രതീക്ഷയിൽ അമേരിക്കൻ വിപണിയിൽ ഉണർവുണ്ടായിട്ടുണ്ട്.


Source link