വൈപ്പിൻ: മുക്കുപണ്ടം പണയം വച്ച് 2,22,000 രൂപ തട്ടിയ സംഭവത്തിൽ തൃശൂർ ആമ്പല്ലൂർ തണ്ടാശേരി ഷീജ (46) അറസ്റ്റിലായി. ഒരു പരിചയക്കാരി മുഖേന ഞാറക്കലുള്ള ഫൈനാൻസ് സ്ഥാപനത്തിൽ നിന്ന് ഈ മാസം 11നും 14നുമാണ് മുക്കുപണ്ടം പണയം വച്ചത്. സംശയം തോന്നിയ ഫൈനാൻസ് ഉടമ പൊലീസിൽ പരാതി നൽകി. പണയം വച്ച ഞാറക്കലുള്ള സ്ത്രീയെ പൊലീസ് ചോദ്യം ചെയ്തിരുന്നു. നടപടികൾ തുടരുന്നതിനിടെ ഷീജ വീണ്ടും മുക്കുപണ്ടം പണയം വയ്ക്കാനായി ഈ സ്ത്രീയെ സമീപിച്ചു. ഇവർ വിവരം അറിയിച്ചതുപ്രകാരം പൊലീസെത്തി അറസ്റ്റ് ചെയ്യുകയായിരുന്നു. സമാന രീതിയിലുള്ള 29 കേസുകൾ ഷീജയ്ക്കെതിരെ വിവിധ ജില്ലകളിലുണ്ടെന്ന് പൊലീസ് അറിയിച്ചു. കോടതിയിൽ ഹാജരാക്കി റിമാൻഡ് ചെയ്തു. സി.ഐ കെ. സതീഷിന്റെ നേതൃത്വത്തിലാണ് അന്വേഷണം.
Source link
