പ്രധാന ലക്ഷണങ്ങള് പനിയും ക്ഷീണവും, കുഞ്ഞുങ്ങള്ക്കും മുതിര്ന്നവര്ക്കും ഗുരുതരമാകാം; ജാഗ്രത നിര്ദേശവുമായി ആരോഗ്യവകുപ്പ്
തൊടുപുഴ: ജില്ലയില് ചിക്കന് പോക്സ് പടരുന്ന സാഹചര്യത്തില് ജാഗ്രതാനിര്ദേശവുമായി ആരോഗ്യവകുപ്പ്. രോഗലക്ഷണങ്ങള് കണ്ടാലുടന് ചികിത്സ തേടണമെന്നും രോഗം പകരാതിരിക്കാന് ആവശ്യമായ മുന്കരുതല് സ്വീകരിക്കണമെന്നും അധികൃതര് അറിയിച്ചു. ചിക്കന്പോക്സ് കുമിളകളിലെ സ്രവങ്ങളില് നിന്നും അണുബാധയുള്ളവര് ചുമയ്ക്കുമ്പോഴും തുമ്മുമ്പോഴും മറ്റും തെറിക്കുന്ന കണങ്ങളിലൂടെയും അണുബാധ പകരാം. രോഗലക്ഷണങ്ങള് പ്രകടമാകുന്നതിന് 10 മുതല് 21 ദിവസം വരെയാണ് സമയമെടുക്കുക.
രോഗം പകര്ന്നാല്
മുഖം, ഉദരഭാഗം, നെഞ്ച്, കൈകാലുകള്, എന്നിവിടങ്ങളില് തടിപ്പുകളായ തുടങ്ങി വെള്ളം കെട്ടിനില്ക്കുന്ന കുമിളകള് വരും. നാലു മുതല് ഏഴ് ദിവസത്തിനുള്ളില് അവ പൊട്ടുകയോ പൊറ്റയാവുകയോ ചെയ്യാം. രോഗബാധിതര്ക്ക് വായുസഞ്ചാരമുള്ള മുറിയില് പരിപൂര്ണ്ണ വിശ്രമം വേണം. ധാരാളം വെള്ളം കുടിക്കണം. പഴവര്ഗ്ഗങ്ങള് കഴിക്കാം. മറ്റുള്ളവരുമായി നേരിട്ടുള്ള സമ്പര്ക്കം ഒഴിവാക്കണം. രോഗി ഉപയോഗിച്ച വസ്ത്രങ്ങളും മറ്റു വസ്തുക്കളും മറ്റുള്ളവരുമായി പങ്കിടാതെ ബ്ലീച്ചിങ് ലായനി ഒഴിച്ച് വൃത്തിയാക്കണം. ചൊറിച്ചിലിന് കലാമിന് ലോഷന് ഉപയോഗിക്കാം. കുഞ്ഞുങ്ങളുടെ ശരീരം മൃദുവായ തുണി കൊണ്ട് ഒപ്പിയെടുക്കണം. മുതിര്ന്നവര്ക്ക് ചൊറിച്ചില് കുറയ്ക്കാന് സാധാരണ വെളളത്തില് കുളിക്കാം. കൈകളിലെ നഖം വെട്ടി വൃത്തിയായി സൂക്ഷിക്കണം. കൈകള് സോപ്പ് ഉപയോഗിച്ച് വൃത്തിയായി കഴുകണം. സ്ഥിരമായി ഉപയോഗിച്ച് കൊണ്ടിരിക്കുന്ന മരുന്നുകള് നിര്ത്തരുത്.
പ്രധാന ലക്ഷണങ്ങള്: പനി, ക്ഷീണം, ശരീരവേദന, തലവേദന, വിശപ്പില്ലായ്മ, ശരീരത്തില് കുമിളകള്
ഗുരുതരമാകാനിടയുള്ളവര്
ഒരു വയസില് താഴെയുള്ള കുഞ്ഞുങ്ങള്
ഗര്ഭിണികള്
മുതിര്ന്ന പൗരന്മാര്
ദീര്ഘകാലമായി ശ്വാസംമുട്ട്, ത്വക്ക് രോഗങ്ങള് ഉള്ളവര്
പ്രതിരോധശേഷി കുറഞ്ഞവര്
Source link
