ഏപ്രിൽ ഫൂളിന് പറ്റിച്ചവരുടെ ശ്രദ്ധയ്ക്ക്, നിങ്ങളുടെ ആ ശീലം ഒരു തരത്തിൽ ആരോഗ്യത്തിന് ഏറെ നല്ലതാണ്

ഓരോ വർഷവും ഏപ്രിൽ ഒന്നാം തീയതി നാം പരസ്പരം പറ്റിച്ചും ചിരിച്ചും ആഘോഷിക്കാറുണ്ട്. ഈ കുസൃതിത്തരങ്ങൾ വെറും വിനോദത്തിനപ്പുറം ചില രഹസ്യങ്ങൾ കൂടി ഒളിപ്പിച്ചു വച്ചിട്ടുണ്ട്. ഏപ്രിൽ ഫൂൾ ദിനത്തിൽ സുഹൃത്തുക്കളെ പറ്റിക്കുന്നത് വെറുമൊരു തമാശ മാത്രമല്ല, അത് ആരോഗ്യത്തിന് ഏറെ ഗുണകരമാണെന്നാണ് വിദഗ്ധർ പറയുന്നത്. തമാശകളും ചിരിയും എങ്ങനെയാണ് നമ്മുടെ ശരീരത്തെയും മനസ്സിനെയും സ്വാധീനിക്കുന്നത് എങ്ങനെയെന്നറിയാം.

സ്ട്രെസ് കുറയ്ക്കുന്നു
നാം ഒരു തമാശ കേട്ട് പൊട്ടിച്ചിരിക്കുമ്പോൾ ശരീരത്തിലെ സ്ട്രെസ് ഹോർമോണുകളായ കോർട്ടിസോൾ, എപിനെഫ്രിൻ എന്നിവയുടെ അളവ് കുറയുന്നു. ഇത് മനസ്സിനെ ശാന്തമാക്കാനും ഉത്കണ്ഠ കുറയ്ക്കാനും സഹായിക്കുന്നു. നന്നായി ചിരിക്കുമ്പോൾ തലച്ചോറിൽ എൻഡോർഫിനുകൾ, ഡോപാമൈൻ, ഓക്സിടോസിൻ എന്നീ ഹോർമോണുകൾ ഉത്പാദിപ്പിക്കപ്പെടുന്നു. ഇവ പ്രകൃതിദത്തമായ വേദനസംഹാരികളായി പ്രവർത്തിക്കുകയും മനസ്സിന് സന്തോഷം നൽകുകയും ചെയ്യുന്നു.

ഹൃദയാരോഗ്യത്തിന് ഉത്തമം
ചിരിക്കുമ്പോൾ രക്തയോട്ടം വർദ്ധിക്കുകയും രക്തധമനികളുടെ പ്രവർത്തനം മെച്ചപ്പെടുകയും ചെയ്യുന്നു. ഇത് രക്തസമ്മർദ്ദം കുറയ്ക്കാനും ഹൃദയാഘാതം പോലുള്ള പ്രശ്നങ്ങൾ തടയാനും ഒരു പരിധിവരെ സഹായിക്കുമെന്ന് പഠനങ്ങൾ പറയുന്നു. ചിരി ശരീരത്തിലെ ആന്റിബോഡികളെ വർദ്ധിപ്പിക്കുകയും രോഗപ്രതിരോധ കോശങ്ങളെ സജീവമാക്കുകയും ചെയ്യുന്നു. ഇതുവഴി അസുഖങ്ങളെ പ്രതിരോധിക്കാനുള്ള ശരീരത്തിന്റെ ശേഷി കൂടുന്നു.

അടുപ്പം വർധിപ്പിക്കുന്നു
സുഹൃത്തുക്കളുമായും കുടുംബാംഗങ്ങളുമായും തമാശകൾ പങ്കുവയ്ക്കുന്നത് അവർക്കിടയിലുള്ള മാനസികമായ അടുപ്പം വർധിപ്പിക്കുന്നു. ഒരുമിച്ച് ചിരിക്കുന്നത് വിശ്വാസവും സ്നേഹവും വളർത്താൻ സഹായിക്കുന്നു. ഒരു സുഹൃത്തിനെ പറ്റിക്കാനായി നാം പുതിയ വഴികൾ ആലോചിക്കുമ്പോൾ അത് നമ്മുടെ സർഗ്ഗാത്മക ചിന്തയെ ഉണർത്തുന്നു. സങ്കീർണ്ണമായ തമാശകൾ ആസൂത്രണം ചെയ്യുന്നത് തലച്ചോറിന് ഒരു വ്യായാമം പോലെയാണ്.

എന്നാൽ തമാശകൾ എപ്പോഴും മറ്റുള്ളവരെ വേദനിപ്പിക്കാത്ത രീതിയിലായിരിക്കണം. പ്രിയപ്പെട്ടവർക്ക് മാനസികമായോ ശാരീരികമായോ ബുദ്ധിമുട്ടുണ്ടാക്കുന്ന കാര്യങ്ങൾ ഒഴിവാക്കി, എല്ലാവർക്കും ഒന്നിച്ച് ചിരിക്കാൻ കഴിയുന്ന തരത്തിലുള്ള തമാശകൾ വേണം തിരഞ്ഞെടുക്കാൻ.

ഏപ്രിൽ ഫൂൾ ദിനത്തിന്റെ ഉത്ഭവം?
ഏപ്രിൽ ഫൂൾ ദിനത്തിന്റെ ഉത്ഭവം ഇന്നും അജ്ഞാതമാണ്. ചിലർ അഭിപ്രായപ്പെടുന്നത് 1582-ൽ ഫ്രാൻസ് ജൂലിയൻ കലണ്ടറിൽ നിന്ന് ഗ്രിഗോറിയൻ കലണ്ടറിലേക്ക് മാറിയപ്പോഴാണ് ഇത് ആരംഭിച്ചത് എന്നാണ്. ഫ്രാൻസ് ഈ മാറ്റം വരുത്തിയതിനാൽ, വർഷാരംഭം ഏപ്രിൽ 1 മുതൽ ജനുവരി 1 വരെ മാറി എന്ന വാർത്ത എല്ലാവർക്കും ലഭിച്ചിരുന്നില്ല എന്നാണ് പറയപ്പെടുന്നത്. അവർ ഏപ്രിൽ 1-ന് അത് ആഘോഷിച്ചുകൊണ്ടിരുന്നു, അവരെ ഏപ്രിൽ ഫൂൾസ് എന്ന് പരിഹസിച്ചു.