ഇടിമിന്നലേറ്റ് കാലിത്തൊഴുത്തിൽ പശു ചത്തുവീണു; പരിശോധിക്കാൻ കയറിയ ഉടമ ഷോക്കേറ്റു മരിച്ചു

ആലപ്പുഴ: ഇടിമിന്നലിനെത്തുടർന്ന് ചത്തുവീണ പശുവിനെ നോക്കാൻ കാലിത്തൊഴുത്തിൽ കയറിയ ക്ഷീരകർഷകൻ ഷോക്കേറ്റുമരിച്ചു. ഇലിപ്പക്കുളം വട്ടയ്‌ക്കാട് പുത്തൻതറയിൽ രാമകൃഷ്ണപിള്ള(72)യാണ് മരിച്ചത്. തൊഴുത്തിലെ ബൾബിലേക്കുള്ള വയറിൽ നിന്നാണ് ഷോക്കേറ്റത്. ശനിയാഴ്‌ച രാത്രി ഒമ്പതരയോടെയാണ് സംഭവം.

ഇടിമിന്നലേറ്റ് പശു കരയുകയും തുടർന്ന് ചത്തുവീഴുകയുമായിരുന്നു. ശബ്‌ദംകേട്ട് രാമകൃഷ്‌ണപിള്ള വീട്ടുമുറ്റത്തുള്ള കാലിത്തൊഴുത്തിലേക്ക് ഓടിച്ചെന്നു. ഈസമയം തൊഴുത്തിന്റെ മേൽക്കൂരയിൽ കെട്ടിയിരുന്ന വൈദ്യുത ബൾബിലേക്കുള്ള വയറിൽ നിന്ന് ഇദ്ദേഹത്തിന് ഷോക്കേൽക്കുകയായിരുന്നു. പിന്നാലെ ചെന്ന മകൾ ഷീജയ്‌ക്ക് ഷോക്കേറ്റെങ്കിലും രക്ഷപ്പെട്ടു. അർബുദരോഗബാധിതനായ രാമകൃഷ്‌ണപിള്ള കഴിഞ്ഞ ആറുവർഷമായി ചികിത്സയിലായിരുന്നു. വള്ളിക്കുന്നം പൊലീസ് തുടർനടപടികൾ സ്വീകരിച്ചു.