‘ആദ്യ വിവാഹം നീണ്ടുനിന്നത് ഒരുമാസം മാത്രം, രാഹുലുമായി സൗഹൃദത്തിലായത് അഞ്ച് മാസത്തിന് ശേഷം’; യുവതിയുടെ മൊഴി പുറത്ത്
തിരുവനന്തപുരം: രാഹുൽ മാങ്കൂട്ടത്തിൽ എംഎൽഎയ്ക്കെതിരെ പീഡന പരാതി നൽകിയ യുവതിയുടെ മൊഴി പുറത്ത്. ആദ്യ വിവാഹത്തിന് ശേഷമാണ് രാഹുൽ മാങ്കൂട്ടത്തിലിനെ പരിചയപ്പെട്ടത്. ഒരു മാസം മാത്രം നീണ്ടുനിന്ന വിവാഹം രജിസ്ടർ ചെയ്തിട്ടില്ല. രാഹുലിനെ പരിചയപ്പെടുന്നത് വിവാഹം ഒഴിഞ്ഞ് അഞ്ച് മാസത്തിന് ശേഷമാണെന്നും യുവതി മൊഴി നൽകി.
വ്യക്തിപരമായ കുടുംബപ്രശ്നത്തിൽ പ്രത്യേകിച്ച് ഭർത്താവുമായുള്ള പ്രശ്നത്തിൽ രാഹുൽ മാങ്കൂട്ടത്തിൽ ഇടപെട്ടിട്ടുണ്ട്. പിന്നീട് രാഹുൽ മാങ്കൂട്ടത്തിലുമായി സൗഹൃദത്തിലാവുകയും അത് പ്രണയത്തിൽ കലാശിക്കുകയുമായിരുന്നു എന്നും യുവതിയുടെ മൊഴിയിലുണ്ട്. 2024 ഓഗസ്റ്റിൽ ഹിന്ദുമതാചാരപ്രകാരം ഒരു ക്ഷേത്രത്തിൽ വച്ച് യുവതിയുടെ വിവാഹം നടന്നെങ്കിലും ബന്ധം അധികനാൾ നീണ്ടുനിന്നില്ല. പാലക്കാട് നിന്നും പിന്നീട് തിരുവനന്തപുരത്തേക്ക് യുവതി താമസം മാറി. വിവാഹ ബന്ധം പിരിഞ്ഞ് നാല് മാസത്തിന് ശേഷമാണ് രാഹുൽ മാങ്കൂട്ടത്തിലുമായി സൗഹൃദത്തിലാകുന്നത്. 2025 മാർച്ച് മാസം മുതലാണ് രാഹുലുമായി തിരുവനന്തപുരത്തെ ഫ്ലാറ്റിൽ വച്ച് ശാരീരികബന്ധം നടന്നതെന്നും യുവതി പൊലീസിന് നൽകിയ മൊഴിയിൽ പറയുന്നു.
യുവതിയുടെ മൊഴി അന്വേഷണ സംഘം പരിശോധിക്കുകയാണ്. നിയമപരമായ കാര്യങ്ങൾ കൂടി വിശദമായി പരിഗണിക്കും. ഇതിന് ശേഷമാകും രാഹുൽ മാങ്കൂട്ടത്തിലിന്റെ മുൻകൂർ ജാമ്യാപേക്ഷ പരിഗണിക്കുക.
Source link
