മദ്യപിച്ച യാത്രക്കാരന്റെ മുഖത്തടിച്ചു; കെഎസ്ആർടിസി ജീവനക്കാരൻ മർദിക്കുന്ന ദൃശ്യങ്ങൾ പുറത്ത്

ഇടുക്കി: ബസ് സ്റ്റാൻഡിൽ മദ്യപിച്ചെത്തിയ യാത്രക്കാരനെ കെഎസ്ആർടിസി ജീവനക്കാരൻ മർദിക്കുന്ന ദൃശ്യങ്ങൾ പുറത്ത്. യാത്രക്കാരന്റെ മുഖത്തടിക്കുന്ന ദൃശ്യങ്ങളാണ് പുറത്തുവന്നത്. ബുധനാഴ്ച വൈകിട്ട് അടിമാലി ഭാഗത്തുനിന്നു തൊടുപുഴയിലേക്കുള്ള ബസിൽ മദ്യപിച്ച് യാത്ര ചെയ്തയാൾ സഹയാത്രക്കാരുമായി വാക്കേറ്റം ഉണ്ടാക്കിയെന്നാണ് ജീവനക്കാർ പറയുന്നത്. ബസ് തൊടുപുഴ സ്റ്റാൻഡിൽ എത്തിയപ്പോൾ മദ്യപൻ കൈയേറ്റശ്രമവും നടത്തി.

ഇതിനിടെ, യൂണിഫോം ധരിച്ചെത്തിയ ജീവനക്കാരൻ യാത്രക്കാരന്റെ മുഖത്തടിക്കുകയായിരുന്നു. പിന്നാലെ മറ്റൊരു യാത്രക്കാരനും മർദിച്ചു. പിന്നീടെത്തിയ പൊലീസ് യാത്രക്കാരനെ അനുനയിപ്പിച്ചു പറഞ്ഞുവിടുകയായിരുന്നു. സംഭവത്തിൽ പരാതിയോ കേസോ ഇല്ലെന്നാണ് പൊലീസ് പറയുന്നത്. എന്നാൽ, ജീവനക്കാർ മർദിച്ചിട്ടില്ലെന്നും യാത്രക്കാർ തമ്മിലാണ് പ്രശ്നം ഉണ്ടായതെന്നുമാണ് ഡിപ്പോ അധികൃതരുടെ വിശദീകരണം.