അർജുനായുള്ള മൂന്നാം ഘട്ട തെരച്ചിൽ; ഗംഗാവലി പുഴയിൽ ക്യാമറ ഇറക്കി പരിശോധിക്കും
ബംഗളൂരു: കർണാടകയിലെ ഷിരൂരിൽ മണ്ണിടിച്ചിലിൽ കാണാതായ കോഴിക്കോട് സ്വദേശി അർജുനായുള്ള മൂന്നാം ഘട്ട തെരച്ചിൽ ഇന്നും തുടരും. അർജുൻ സഞ്ചരിച്ച ലോറിയുടെ ക്യാബിൻ കണ്ടെത്തുന്നതിനാണ് പ്രഥമ പരിഗണന. ഗംഗാവലി പുഴയിൽ ക്യാമറ ഇറക്കി പരിശോധന നടത്തും. അർജുനടക്കം കാണാതായ മൂന്നുപേരെയാണ് ഇനി കണ്ടത്തേണ്ടത്. കാർവാറിൽ നിന്ന് എത്തിച്ച ഡ്രഡ്‌ജർ ഉപയോഗിച്ചാണ് തെരച്ചിൽ. പരിശോധനാ സ്ഥലത്തേക്ക് അർജുന്റെ സഹോദരിയും ഇന്ന് എത്തും.
ഇത് അവസാന ശ്രമമെന്ന് കാർവാർ എം എൽ എ സതീഷ് സെയിൽ നേരത്തേ പ്രതികരിച്ചിരുന്നു. ലോറിയുടെ ക്യാബിൻ കണ്ടെത്തിയാൽ അർജുൻ എവിടെ എന്നതിന്റെ ഉത്തരം കിട്ടുമെന്ന് പ്രതീക്ഷിക്കുന്നതായി അർജുന്റെ കുടുംബവും പ്രതികരിച്ചു. 66 ദിവസത്തെ ഇടവേളയ്ക്ക് ശേഷമാണ് മൂന്നാം ഘട്ട തെരച്ചിൽ ആരംഭിക്കുന്നത്. വേലിയേറ്റം ആരംഭിച്ചതോടെ ഇന്നലെ രാവിലെ പത്ത് മണിക്ക് തന്നെ ഡ്രഡ്‌ജർ ഷിരൂരിനെ ലക്ഷ്യമാക്കി നീങ്ങി.
കൊങ്കൺ പാത കടന്ന് പോകുന്ന മഞ്ജു ഗുണിയിലെ പുതിയ പാലം കടന്ന് അപകട സ്ഥലത്തിന് 200 മീറ്റർ അകലെ നങ്കൂരമിട്ടു. അർജുന്റെ ലോറി ഉണ്ടെന്ന് സംശയിക്കുന്ന സി പി നാലിന് സമീപം ആയിരുന്നു ഇത്. വൈകിട്ട് അഞ്ച് മണിയോടെയാണ് കാർവാർ എം എൽ എയും ജില്ലാ കളക്ടറും സ്ഥലത്തെത്തിയത്. തുടർന്ന് ദൗത്യം തുടങ്ങുന്നതിന് മുമ്പുള്ള പൂജ നടത്തി.
Source link
