റഷ്യയും പാശ്ചാത്യരാജ്യങ്ങളും തമ്മിൽ തടവുകാരെ കൈമാറാൻ തീരുമാനം
വാഷിംഗ്‌ടൺ: അഞ്ചു വർഷത്തിലേറെ നീണ്ട നയതന്ത്രനീക്കങ്ങൾക്കൊടുവിൽ റഷ്യയും പാശ്ചാത്യരാജ്യങ്ങളും തമ്മിൽ തടവുകാരെ കൈമാറാൻ തീരുമാനിച്ചു. തുർക്കി തലസ്ഥാനമായ അങ്കാറയിൽ നടന്ന ചർച്ചയിലാണ് തടവുകാരെ കൈമാറാനുള്ള ധാരണ ഉരുത്തിരിഞ്ഞത്. തടവുകാരെ കൈമാറാനുള്ള ധാരണയിൽ അമേരിക്കയ്ക്കും റഷ്യക്കും പുറമേ റഷ്യയുടെ സഖ്യകക്ഷിയായ ബെലാറൂസ്, അമേരിക്കയുടെ സഖ്യകക്ഷികളായ ജർമനി, പോളണ്ട്, സ്ലൊവേനിയ, നോർവെ എന്നീ രാജ്യങ്ങളും കക്ഷികളാണ്. ധാരണപ്രകാരം 24 തടവുകാരെ ഇന്നലെ കൈമാറി. പാശ്ചാത്യരാജ്യങ്ങളിൽ തടവിലായിരുന്ന രണ്ടു പ്രായപൂർത്തിയാകാത്തവരടക്കം എട്ടു തടവുകാരെ റഷ്യക്ക് കൈമാറിയപ്പോൾ റഷ്യയിൽ തടവിലായിരുന്ന 12 പൗരന്മാരെ ജർമനിക്കും വാൾസ്ട്രീറ്റ് ജേർണൽ റിപ്പോർട്ടർ ഇവാൻ ഗെർഷകോവിച്ച്, മുൻ യുഎസ് മറീൻ പോൾ വെലാൻ എന്നിവരടക്കം നാല് തടവുകാരെ അമേരിക്കയ്ക്കും കൈമാറി.
ചാരവൃത്തി ആരോപിച്ചാണ് ഗെർഷകോവിച്ചിനെ 2023 മാർച്ചിൽ റഷ്യ അറസ്റ്റ് ചെയ്തത്. കഴിഞ്ഞ മാസം അദ്ദേഹത്തിന് റഷ്യൻ കോടതി 16 വർഷം തടവുശിക്ഷ വിധിക്കുകയും ചെയ്തിരുന്നു. ശീതയുദ്ധത്തിനുശേഷം നടക്കുന്ന ഏറ്റവും വലിയ തടവുകാരുടെ കൈമാറ്റമാണിതെന്നും അമേരിക്കയുടെയും സഖ്യകക്ഷികളും‌ടെയും കൂട്ടായ പ്രയത്നത്തിലൂടെയാണ് ഇതു സാധ്യമായതെന്നും യുഎസ് ദേശീയ സുരക്ഷാ ഉപദേഷ്‌ടാവ് ജാക് സുള്ളിവൻ പറഞ്ഞു. റഷ്യയിൽനിന്നു മോചിതരായ അമേരിക്കൻ തടവുകാരുടെ കുടുംബാംഗങ്ങളുമായി കൂടിക്കാഴ്ച നടത്തിയ പ്രസിഡന്‍റ് ജോ ബൈഡൻ ഈ സന്തോഷവാർത്ത അവരെ അറിയിച്ചെന്നും സുള്ളിവൻ കൂട്ടിച്ചേർത്തു.
Source link
