സിനിമയെ സ്നേഹിക്കുന്ന ഒരു കൂട്ടത്തിന്റെ ‘ആട്ടം’

പുതുമുഖങ്ങളായ 9 അഭിനേതാക്കൾ. 11 പേരുള്ള ലോക ധർമി എന്ന നാടക ഗ്രൂപ്പിന്റെ ഭാഗമായുള്ളവർ. സംവിധായകനും അതിൽ ഉൾപ്പെടും. സ്വന്തം പേരിൽ തന്നെ അവർ സിനിമയിലും അഭിനയിച്ചു. നാടകത്തിൽ നിന്നും സിനിമയിലേക്കുള്ള  അവരുടെ യാത്രയെക്കുറിച്ച് കേൾക്കാം..
ഒരു യാത്രയ്ക്കിടയിലാണ് ആട്ടം ആദ്യമായി മനസ്സിൽ രൂപപ്പെട്ടത് എന്ന് നടനും ലോകധർമിയിൽ വർഷങ്ങളോളം പ്രവർത്തിച്ച വിനയ് ഫോർട്ട് പറയുന്നു. ‘‘ഞായറാഴ്ചകളിൽ മാത്രം ഉണ്ടായിരുന്ന ഒരു നാടക ഗ്രൂപ്പായിരുന്നു ലോകധർമി. എല്ലാത്തരം ജോലികൾ ചെയ്യുന്നവരും അതിൻ്റെ ഭാഗമാണ്. എല്ലാത്തരം കലാരൂപങ്ങളും ഇതിന്റെ ഭാഗമായി അറിയാൻ കഴിഞ്ഞു. കഥകളിയുടെയും കൂടിയാട്ടത്തിന്റെയുമൊക്കെ വർക്ക്ഷോപ്പുകൾ ഉണ്ടായിരുന്നു. അങ്ങനെ ഞങ്ങൾ കർണഭാരം എന്നൊരു നാടകം ചെയ്തു. പിന്നീട് പൂണൈയിൽ പഠിക്കാൻ പോയെങ്കിലും ഒരു നടൻ എന്ന നിലയിൽ എന്നെ രൂപപ്പെടുത്തിയത് ഈ ഗ്രൂപ്പും അതിലെ ആൾക്കാരുമാണ് എന്ന് ഉറപ്പിച്ചു പറയാം. എല്ലാവരുടെയും ഉള്ളിൽ സിനിമ എന്നൊരു മോഹം ഉണ്ടായിരുന്നു. ഇത്രയും വർഷത്തെ കലയുമായുള്ള ഞങ്ങളുടെ ബന്ധത്തെ അടയാളപ്പെടുത്തുന്ന ഒന്നാണ് ആട്ടം.’’

സംവിധായകനായ ആനന്ദ് ഏകർഷിയും ലോക ധർമിയുടെ ഭാഗമാണ്. 10 വയസ്സു മുതൽ 24 വയസ്സുവരെയും അദ്ദേഹം നാടക മേഖലയിൽ പ്രവർത്തിച്ചു. നിരവധി നാടകങ്ങളിൽ അഭിനയിക്കുകയും ചെയ്തു.

‘‘ഞങ്ങളുടെ കൂട്ടത്തിൽ നിന്നും ഒരു സിനിമ ഉണ്ടാകുമ്പോൾ അത് ഏറ്റവും നന്നായി ചെയ്യാൻ കഴിയുന്നത് ആനന്ദിനാണ് എന്നൊരു വിശ്വാസം ഉണ്ടായിരുന്നു. ആനന്ദ്, ഹിന്ദി സംവിധായകൻ ഇംതിയാസ് അലിയുടെ അസിസ്റ്റന്റ് കൂടിയായിരുന്നു. അതിനുപുറമേ മികച്ച ലീഡർഷിപ്പ് ക്വാളിറ്റിയും  ഉണ്ട്. ഇത്രയും അഭിനേതാക്കളെ ഒരുമിച്ച് ഒരു സ്ക്രീനിൽ അവതരിപ്പിക്കുമ്പോൾ മറ്റെന്തിനേക്കാളും ആ ഒരു ലീഡർഷിപ്പ് ക്വാളിറ്റി തന്നെയാണ് വേണ്ടത്. എല്ലാവരെയും പ്രധാന കഥാപാത്രങ്ങൾ ആക്കി കൊണ്ടിരുന്ന ഒരു സിനിമ എന്നതായിരുന്നു ആദ്യത്തെ ചിന്ത.’’ വിനയ് പറയുന്നു.

ചലച്ചിത്ര പ്രേമികളുടെ പ്രിയപ്പെട്ട അസ്കർ ഫർഹാദി യുടെ സ്വാധീനവും സിനിമയിൽ കാണാൻ കഴിയും. യാന്ത്രികമായി ഡയലോഗുകൾ പറയാതെയുള്ള വളരെ റിയലിസ്റ്റിക് ആയി എന്നാൾ ഡയലോഗുകളിൽ ഊന്നിയുള്ള പ്രകടനം കാഴ്ചവെക്കാൻ അത്തരം സിനിമകൾ ഇവരെ സഹായിച്ചിട്ടുണ്ട് എന്ന് ആട്ടത്തിലെ ഓരോരുത്തരും സമ്മതിക്കുന്നു. വിനയ് ഫോർട്ട്, നന്ദൻ ഉണ്ണി, ഷാജോൺ, സരിൻ ശിഹാബ്  എന്നിവർ ഒഴിച്ച് മറ്റെല്ലാവരും തന്നെ പുതുമുഖങ്ങൾ ആണ്. 
‘‘നാടകത്തിന്റെ പ്രതികരണം വളരെ ലൈവ് അറിയാൻ കഴിയും. അതൊരു പ്രത്യേക ഫീൽ തന്നെയാണ്. എന്നാൽ സിനിമയിലേക്ക് വന്നപ്പോൾ മറ്റൊരു തരത്തിലാണ് പ്രതികരണങ്ങൾ ലഭിച്ചത്. നാടകത്തിൽ കിട്ടുന്ന ഒരു സ്വാതന്ത്ര്യം സിനിമയുടെ പരിമിതമായ സ്പേസിൽ ഇല്ലെങ്കിലും മുപ്പതോളം ദിവസം റിഹേഴ്സൽ നടത്തിയതുകൊണ്ട് നന്നായി പെർഫോം ചെയ്യാൻ കഴിഞ്ഞു. ഐഎഫ് എഫ്കെയില്‍ ലഭിച്ച പ്രതികരണങ്ങൾ അതിന് സാക്ഷിയാണ്.’’ നന്ദൻ ഉണ്ണി പറയുന്നു.

ആനന്ദ് ഏകർഷി

നാടക പശ്ചാത്തലം സിനിമയുടെ ചിത്രീകരണത്തിലും അഭിനേതാക്കളെ സിനിമയുമായിപരിചയപ്പെടുത്തുന്നതനും സഹായിച്ചിട്ടുണ്ട് എന്ന് സംവിധായകനായ ആനന്ദ് ഏകർഷി പറയുന്നു. 
‘‘35 ഓളം ദിവസം റിഹേഴ്സൽ നടത്തിയാണ് എല്ലാവരെയും സിനിമയും ആയിട്ട് പരിചയപ്പെടുത്തിയത്. നാടകത്തിൽ നിന്നും സിനിമയിലേക്കുള്ള ട്രാൻസിഷൻ അത്രത്തോളം സ്മൂത്താക്കണമെന്നുണ്ടായിരുന്നു. ക്യാമറ വെച്ച് തന്നെ വിഹേഴ്സൽ നടത്തിയതുകൊണ്ട് സിനിമ തുടങ്ങുമ്പോഴേക്കും അത്രയും ആളുകൾ ചുറ്റും നിന്നെങ്കിലും എല്ലാവരും തന്നെ വളരെ കംഫർട്ടബിൾ ആയി അഭിനയിച്ചു. 16 വർഷത്തോളം നിരവധി നാടകങ്ങളിൽ അഭിനയിച്ചിട്ടുണ്ട് എന്നതുകൊണ്ട് തന്നെ അത് നൽകിയ ആത്മവിശ്വാസവും ലീഡർഷിപ്പ് സ്കില്ലും ഏതൊരു പ്രതിസന്ധിയും മറികടക്കാനുള്ള ധൈര്യവും തന്നെയാണ് സിനിമയെടുത്തപ്പോഴും ഉണ്ടായിരുന്നത്. അഭിനേതാക്കളെ നിയന്ത്രിക്കുന്നതിലും അതേറെ സഹായിച്ചു.’’

മേളയിലും തിയറ്ററിൽ റിലീസും ചെയ്ത സിനിമ ആയത് കൊണ്ട് തന്നെ ആട്ടത്തിന് രണ്ട് തരത്തിലുള്ള പ്രേക്ഷക പ്രതികരണങ്ങൾ ലഭിച്ചു എന്ന് ആനന്ദ് പറയുന്നു. 
‘‘സിനിമയുടെ ചിത്രീകരണത്തിൽ തന്നെ എല്ലാത്തരം പ്രേക്ഷകരെയും തൃപ്തിപ്പെടുത്തുന്ന സിനിമയായിരിക്കണം എന്ന് ഞങ്ങൾ കരുതിയിരുന്നു. മേളകളിലേക്ക് പോയാലും ഏറ്റവും സാധാരണ ആളുകളിലേക്ക് എത്തിയാലും അവർക്ക് ആട്ടം ഇഷ്ടപ്പെടണമെന്ന് ഉണ്ടായിരുന്നു. അതെങ്ങനെ ചെയ്യാം എന്നതായിരുന്നു ഞങ്ങളുടെ ചിന്ത. കഥാപാത്രങ്ങളുടെ രൂപകല്പനയിലും സംഭാഷണങ്ങളിലും അതുകൊണ്ടുതന്നെ അത്തരമൊരു ശ്രദ്ധ പുലർത്തിയിരുന്നു.’’

തിയറ്റർ പശ്ചാത്തലമുള്ള അഭിനേതാക്കളെ സ്ക്രീനിലേക്ക് കൊണ്ടുവരുമ്പോൾ ചായഗ്രഹണവും വളരെ പ്രാധാന്യം ഉള്ളതാണ്. സാധാരണഗതിയിൽ നാടക പശ്ചാത്തലം വരുന്ന സിനിമകൾ അല്ലെങ്കിൽ നാടകവുമായി ചേർന്ന് നിൽക്കുന്ന സിനിമകളിൽ നാടകത്തിന്റേതായ സ്റ്റേജിങ് തന്നെ സിനിമാറ്റോഗ്രഫി യിലും കാണാൻ കഴിയും. ആദ്യകാല മലയാള സിനിമയിൽ ഇത് കൂടുതലായി കാണാൻ കഴിഞ്ഞിരുന്നു. നൻപകൽ നേരത്ത് മയക്കം പോലെയുള്ള സിനിമകളിലും ഇത്തരം ഒരു ഫ്രെയിമിങ് കാണാൻ കഴിയും. സ്റ്റിൽ ഷോട്ടുകൾ ഉപയോഗിച്ചിരിക്കുന്നത് കൊണ്ടുതന്നെ ഫ്രെയിമിനെ സ്റ്റേജ് ആയും അഭിനേതാക്കൾ ഫ്രെയിമിലേക്ക് വരുന്നതായും സ്റ്റേജിലേതു പോലെ തന്നെ എക്സിറ്റ് ചെയ്യുന്നതായും തോന്നും. എന്നാൽ അത്തരത്തിലുള്ള ഒരു സ്റ്റേജിങ്ങിനപ്പുറം സിനിമാറ്റിക്കായ ഛായാഗ്രഹണ രീതിയാണ് ആട്ടത്തിൽ ഉപയോഗിച്ചിരിക്കുന്നത്. 

അനിരുദ്ധ്

‘‘രണ്ട് രീതിയിൽ സിനിമറ്റോഗ്രഫി ചെയ്യാം, കഥയ്ക്ക് ആവശ്യമായ രീതിയിലും സിനിമാറ്റോഗ്രഫിക്ക് കൂടുതൽ മനോഹാരിത കൊടുത്തുകൊണ്ടും ചെയ്യാൻ കഴിയും. കഥ പറയാനാണ് ഞാൻ കൂടുതൽ താല്പര്യപ്പെടുന്നത്. ആട്ടത്തിൽ ആ ഒരു കഥ പറച്ചിലുണ്ട് ബ്രീത്തിങ് ഷോട്ടുകൾ ആണ് കൂടുതലായും ഉപയോഗിച്ചിരിക്കുന്നത്. സിനിമാറ്റോഗ്രാഫി മുഴച്ചു നിൽക്കരുത് എന്ന് നിർബന്ധം ഉണ്ടായിരുന്നു സിനിമ എന്താണ് ആവശ്യപ്പെടുന്നത് അതാണ് കൊടുക്കാൻ ശ്രമിച്ചത്. പ്രേക്ഷകന് അവർ കഥാപാത്രങ്ങളുടെ ഇടയിൽ തന്നെയുള്ള ഒരാളായി തോന്നണം എന്നാണ് ഞാൻ ആഗ്രഹിച്ചത്. ഒരുപാട് സിനിമാറ്റിക് സാമഗ്രികൾ ഒന്നും ഉപയോഗിക്കാതെ ഹാൻഡ് ഹെൽഡ് ഷോട്ടുകളാണ് പലതും. ആദ്യം പ്ലാൻ ചെയ്തപ്പോൾ അസ്കർഹാദി സിനിമകളുടെ ഒരു മെലോ രീതിയിലാണ് പിന്നീടാണ് അങ്ങനെ പോരാ എന്ന് തോന്നിയത്.’’– ഛായാഗ്രഹകനായ അനിരുദ്ധ് അനീഷ് പറയുന്നു. 10 വർഷമായി സിനിമയിലും പരസ്യ മേഖലയിലും പ്രവർത്തിക്കുന്ന അനിരുദ്ധ്  ഛായാഗ്രഹകൻ ആനന്ദ് സി. ചന്ദ്രന്റെ  അസോഷ്യേറ്റ് കൂടിയാണ്.

തിയറ്റർ റിലീസിനു ശേഷവും മികച്ച പ്രേക്ഷക പ്രതികരണങ്ങളാണ് ചിത്രത്തിന് ലഭിക്കുന്നത്. സിനിമയുടെ പ്രമേയം സോഷ്യൽ മീഡിയയിലും സിനിമാ ഗ്രൂപ്പുകളിലും ചർച്ച ചെയ്യപ്പെടുന്നുണ്ട്. പുരുഷ കേന്ദ്രീകൃത സമൂഹത്തിന്റെ എല്ലാവിധ പ്രശ്നങ്ങളെയും പുരുഷന്മാരെ കൊണ്ട് തന്നെ പറയിപ്പിക്കുന്നു എന്നൊരു പ്രത്യേകത കൂടി ആട്ടത്തിനുണ്ട്.  ആൺ നോട്ടങ്ങളിലൂടെ ആണുങ്ങളെ തന്നെ നോക്കിക്കാണുകയാണ് ആട്ടം. എന്നാൽ സിനിമയുടെ ഒടുക്കം അത് പെൺ നോട്ടമായി മാറുകയും ചെയ്യുന്നു.
വളരെ സാധാരണക്കാരായ, പല തരം ജോലികൾ ചെയ്ത് സമൂഹത്തിന്റെ പല തലങ്ങളിൽ നിന്നും നാടകത്തിലൂടെ മലയാള സിനിമയിലേക്ക് എത്തിയ ആ 9 പേരെയും കൂടുതൽ സിനിമകളിൽ കാണാൻ കഴിയും എന്ന് പ്രതീക്ഷിക്കാം.  കലയെ ജീവിതമാക്കിയവരിൽ നിന്നും മറ്റെന്താണ് നമുക്ക് പ്രതീക്ഷിക്കാൻ കഴിയുക!