കാത്തിരിപ്പിനു വിരാമമിട്ട് ബുള്ളറ്റ് 650 പുറത്തിറക്കി റോയൽ എൻഫീൽഡ്

റോയൽ എൻഫീൽഡ് ബുള്ളറ്റ് 650 ഇന്ത്യയിൽ പുറത്തിറക്കി. 3,64,865 രൂപ എക്സ്-ഷോറൂം വിലയ്ക്കാണ് മോട്ടോർസൈക്കിൾ വിൽപനയ്ക്ക് എത്തുന്നത്. ഇത് ക്ലാസിക് 650 മോഡലിന്റെ ബേസ് വല്ലം റെഡ്, ബ്രണ്ടിംഗ്തോർപ്പ് ബ്ലൂ കളറുകളുടെ അതേ വിലയിൽ തന്നെയാണ് എന്നത് ശ്രദ്ധേയമാണ്. കൂടാതെ ടോപ്പ്-സ്പെക്ക് ബ്ലാക്ക് ക്രോം കളർ സ്കീം വേരിയന്റുമായി താരതമ്യപ്പെടുത്തുമ്പോൾ ബുള്ളറ്റ് 650 -ക്ക് 14,496 രൂപ കുറവുമാണ്.ബുള്ളറ്റ് 350 -ൽ കാണുന്ന അതേ ഡിസൈൻ ശൈലി തന്നെ 650 മോഡലും ഉപയോഗിക്കുന്നു, ടൈഗർ ഐ ലൈറ്റുകൾ വരുന്ന ഐക്കണിക് റൗണ്ട് ഹെഡ്‌ലൈറ്റ് സജ്ജീകരണം, ടിയർ ഡ്രോപ്പ് ആകൃതിയിലുള്ള ടാങ്ക്, വലിപ്പമേറിയ റിയർ ഫെൻഡർ എന്നിവ ഇതിൽ ഉൾപ്പെടുന്നു. എന്നാൽ ക്ലാസിക് 650 -യെ അപേക്ഷിച്ച്, ഇതിന് സിംഗിൾ-പീസ് സീറ്റ് ലഭിക്കുന്നു. ബാറ്റിൽഷിപ്പ് ബ്ലൂ, കാനൺ ബ്ലാക്ക് എന്നീ രണ്ട് നിറങ്ങളിൽ ഇത് ലഭ്യമാണ്.650 സിസി നിരയിലെ മറ്റ് മോഡലുകളെപ്പോലെ 647.95 സിസി, എയർ, ഓയിൽ-കൂൾഡ്, പാരലൽ-ട്വിൻ എഞ്ചിനാണ് ഇതിന്റെയും ഹൃദയം. എഞ്ചിൻ 46.4 bhp പരമാവധി പവറും 52.3 Nm ടോർക്കും ഉത്പാദിപ്പിക്കുന്നു, കൂടാതെ സ്ലിപ്പ്-ആൻഡ്-അസിസ്റ്റ് ക്ലച്ചുമുള്ള ആറ് സ്പീഡ് ഗിയർബോക്സുമായി കണക്ട് ചെയ്തിരിക്കുന്നു.650 സിസി പ്ലാറ്റ്‌ഫോമിലെ അവസാന മോട്ടോർസൈക്കിളായിരിക്കും ഇത് എന്നാണ് റിപ്പോർട്ട്, ഇതിനുശേഷം, റോയൽ എൻഫീൽഡ് വരാനിരിക്കുന്ന 750 സിസി പ്ലാറ്റ്‌ഫോമിൽ ശ്രദ്ധ കേന്ദ്രീകരിക്കും. വരാനിരിക്കുന്ന 750 സിസി എഞ്ചിന്റെ ആദ്യ പ്രോട്ടോടൈപ്പ് 2026 GT കപ്പിൽ അരങ്ങേറും.


Source link