വർക്കല അപകടം; ഡ്രൈവർ മദ്യലഹരിയിലായിരുന്നു, അപകടമുണ്ടായതിന് പിന്നാലെ ഇറങ്ങിയോടി

വർക്കല: ഉത്സവം കണ്ടുമടങ്ങിയ ജനക്കൂട്ടത്തിലേക്ക് റിക്കവറി വാൻ ഇടിച്ചുകയറി അമ്മയും മകളും മരിച്ച സംഭവത്തിൽ കൂടുതൽ വിവരങ്ങൾ പുറത്ത്. വാഹനം ഓടിച്ച ടോണി മദ്യലഹരിയിലായിരുന്നുവെന്നും അപകടം ഉണ്ടായതിന് പിന്നാലെ ഇയാൾ ഇറങ്ങി ഓടിയെന്നും നാട്ടുകാർ പറഞ്ഞു.

വാഹനം അമിതവേഗത്തിലായിരുന്നുവെന്ന് ദൃക്സാക്ഷി സജിന പറയുന്നു. നാട്ടുകാരുടെ ഇടയിലേക്ക് വാഹനം ഇടിച്ചുകയറ്റി. സ്‌കൂട്ടറിലും കാറിലും ഇടിച്ചശേഷമാണ് റിക്കവറി വാൻ അമ്മയേയും മകളെയും ഇടിച്ചതെന്നും സജിന ഒരു മാദ്ധ്യമത്തോട് പറഞ്ഞു. സംഭവ സ്ഥലത്തേക്ക് ഏറെ വൈകിയാണ് പൊലീസ് എത്തിയതെന്നും അവർ കൂട്ടിച്ചേർത്തു.

ഇന്നലെ രാത്രി 10 മണിയോടെയായിരുന്നു അപകടമുണ്ടായത്. പുലയൻ വിളാകം വീട്ടിൽ രോഹിണി (55), മകൾ അഖില (21) എന്നിവരാണ് അപകടത്തിൽ മരിച്ചത്. രഞ്ജിത്ത്, ഉഷ എന്നിവർക്ക് പരിക്കേറ്റു. ഇവർ വിവിധ ആശുപത്രികളിൽ ചികിത്സയിലാണ്. ആരോഗ്യനില ഗുരുതരമല്ലെന്നാണ് വിവരം.

പേരേറ്റിൽ തൊടിയിൽ ഭഗവതി ക്ഷേത്രത്തിലെ ഉത്സവം കണ്ട് വീട്ടിലേക്ക് മടങ്ങിയവരാണ് അപകടത്തിൽപ്പെട്ടത്. വർക്കലയിൽ നിന്ന് കവലയൂർ ഭാഗത്തേക്ക് അമിതവേഗതയിൽ എത്തിയ റിക്കവറി വാഹനം മറ്റ് രണ്ട് വാഹനങ്ങളിൽ ഇടിച്ചശേഷം ജനക്കൂട്ടത്തിലേക്ക് പാഞ്ഞു കയറുകയുമായിരുന്നു. അപകടത്തിൽ ഗുരുതരമായി പരിക്കേറ്റ രോഹിണിയെയും അഖിലയെയും ഉടൻ വർക്കല ശ്രീനാരായണ മിഷൻ ആശുപത്രിയിൽ എത്തിച്ചെങ്കിലും അപ്പോഴേക്കും മരണം സംഭവിച്ചിരുന്നു.