സ്വര്‍ണക്കടത്ത്: നടി രന്യക്കു ജാമ്യമില്ല
ബംഗളൂരു: സ്വര്‍ണക്കടത്ത് കേസില്‍ അറസ്റ്റിലായ കന്നഡ നടി രന്യ റാവുവിന്‍റെ ജാമ്യാപേക്ഷ കോടതി തള്ളി. ബംഗളൂരുവിലെ സെഷന്‍സ് കോടതിയാണു ജാമ്യപേക്ഷ തള്ളിയത്. രന്യയും സഹായി തരുണ്‍ രാജും ഒരുമിച്ച് ദുബായിലേക്ക് 26 തവണ യാത്ര നടത്തിയെന്നും പലപ്പോഴും രാവിലെ പോകുകയും വൈകുന്നേരം തിരിച്ചെത്തുകയും ചെയ്തിരുന്നതായും ഡയറക്ടറേറ്റ് ഓഫ് റവന്യു ഇന്‍റലിജന്‍സ് (ഡിആര്‍ഐ) അഭിഭാഷകന്‍ മധു റാവു കോടതിയിൽ അറിയിച്ചു. രന്യയെ സ്വർണക്കടത്തിനു സഹായിച്ച സ്വര്‍ണവ്യാപാരി സാഹില്‍ ജെയിനെ ബുധനാഴ്ച ഡിആര്‍ഐ അറസ്റ്റ് ചെയ്തു. ഇതോടെ കേസുമായി ബന്ധപ്പെട്ട് അറസ്റ്റിലായവരുടെ എണ്ണം മൂന്നായി. ഇയാള്‍ക്കാണ് കടത്തിയ സ്വര്‍ണം രന്യ കൈമാറിയിരുന്നതെന്ന് ഡിആര്‍ഐ പറഞ്ഞു.
മാര്‍ച്ച് മൂന്നിന് ദുബായില്‍നിന്ന് കെംപെഗൗഡ അന്താരാഷ്‌ട്ര വിമാനത്താവളത്തില്‍ എത്തിയ രന്യയെ 12.56 കോടി രൂപയുടെ സ്വര്‍ണവുമായി ഡിആര്‍ഐ പിടികൂടുകയായിരുന്നു. ഇതേത്തുടര്‍ന്ന്, അവരുടെ വസതിയില്‍ നടത്തിയ റെയ്ഡില്‍ 2.06 കോടി രൂപയുടെ സ്വര്‍ണാഭരണങ്ങളും 2.67 കോടി രൂപയും ഉദ്യോഗസ്ഥര് കണ്ടെടുത്തിരുന്നു. മുതിർന്ന ഐപിഎസ് ഓഫീസർ രാമചന്ദ്ര ബാബുവിന്‍റെ വളർത്തുമകളാണ് രന്യ.
Source link
