നിങ്ങളെന്നെ കമ്മ്യൂണിസ്റ്റാക്കിക്ക് 70: ഓർമ്മകൾ പങ്കിടാൻ അവർ ഒത്തുകൂടി

തിരുവനന്തപുരം: 70 വർഷം പിന്നിട്ട ‘നിങ്ങളെന്നെ കമ്മ്യൂണിസ്റ്റാക്കി” നാടകത്തിന്റെ ഓർമ്മകൾ അവർ ഒത്തുചേർന്ന് പങ്കിട്ടു. മൂന്നു തലമുറയിലുള്ളവർ.

നാടകത്തിൽ 1952 മുതൽ അഭിനയിച്ച വിജയകുമാരി,​ അണിയറ ശില്പികളായ തോപ്പിൽ ഭാസി, കാമ്പിശേരി കരുണാകരൻ, അഡ്വ.ജനാർദ്ദന കുറുപ്പ്, പുനലൂർ എൻ.രാജഗോപാലൻ നായർ എന്നിവരുടെ മക്കളും കുടുംബാംഗങ്ങളുമാണ് ഒത്തുചേർന്നത്.

കേരള സർവകലാശാലയുടെ നേതൃത്വത്തിൽ നടത്തിയ 2-ാമത് ഭരത് മുരളി നാടകോത്സവ വേദിയിലായിരുന്നു ഈ അപൂർവ്വ സംഗമം.

1952 ഡിസംബർ 6ന് ചവറയിലെ തട്ടാശ്ശേരിയിൽ ആദ്യപ്രദർശനം നടത്തിയ ‘നിങ്ങളെന്നെ കമ്മ്യൂണിസ്റ്റാക്കി”യിൽ ബാലതാരമായാണ് വിജയകുമാരിയുടെ അരങ്ങേറ്റം. 72 വർഷത്തിന് മുമ്പുള്ള ഓർമ്മകൾ പങ്കുവച്ച വിജയകുമാരി 85-ാം വയസ്സിലും നാടകത്തിൽ അഭിനയിക്കാൻ മോഹമുണ്ടെന്നു പറഞ്ഞു.

നാടകാചാര്യൻ ഒ.മാധവന്റെ ഭാര്യയും നടൻ എം.മുകേഷിന്റെ അമ്മയുമാണ് വിജയകുമാരി. നിങ്ങളെന്നെ കമ്മ്യൂണിസ്റ്റാക്കിയിൽ ബാലതാരമായി തുടങ്ങി,​ അമ്മ വേഷത്തിലും ജന്മി പരമുപിള്ളയുടെ ഭാര്യയുടെ വേഷത്തിലും 7000 വേദികളിൽ അഭിനയിച്ചു. ഇതടക്കം 10028 വേദികളിൽ വേഷമിട്ടു. മകൾ സന്ധ്യ രാജേന്ദ്രനും അമ്മയ്ക്കൊപ്പം എത്തിയിരുന്നു.

തോപ്പിൽ ഭാസിയുടെ മക്കളായ തോപ്പിൽ സോമൻ,​ മാല തോപ്പിൽ,​ സുരേഷ് തോപ്പിൽ,​ ചെറുമകൻ പ്രദീപ് തോപ്പിൽ,​ കെ.പി.എ.സി സുലോചനയുടെ ഭർത്താവ് എൻ.കലേശൻ,​ കെ.പി.എ.സി സുധർമ്മയുടെ മകൾ പ്രൊഫ.ചിത്ര ഗംഗാധരൻ,​ പുനലൂർ രാജഗോപാലൻ നായരുടെ മകൾ സൈല,​ കവി ഒ.എൻ.വി. കുറുപ്പിന്റെ ചെറുമകൾ അപർണ രാജീവ്, കെ.പി.എ.സി രാജേന്ദ്രൻ എന്നിവരും സംഗമത്തിൽ പങ്കാളികളായി.