നടരാജഗുരു വിദേശീയരെ ഗുരുവിലേക്ക് ആകർഷിച്ചു: സ്വാമി ശുഭാംഗാനന്ദ

ശിവഗിരി: പാശ്ചാത്യ – പൗരസ്ത്യരാജ്യങ്ങളിൽ ഗുരുദേവന്റെ സർവ്വസമന്വയ ദർശനം എത്തിക്കുന്നതിനും വിദേശീയരെ ഗുരുദർശനത്തിലേക്ക് ആകർഷിക്കുന്നതിനും നടരാജ ഗുരുവിനോളം മറ്റൊരു സന്യസ്ത ശിഷ്യനും കഴിഞ്ഞിട്ടില്ലെന്ന് ശ്രീനാരായണധർമ്മസംഘം ട്രസ്റ്റ് ജനറൽ സെക്രട്ടറി സ്വാമി ശുഭാംഗാനന്ദ അനുസ്മരിച്ചു. ഗുരുദേവന്റെ സന്യസ്ത ശിഷ്യനും നാരായണഗുരുകുലത്തിന്റെ സ്ഥാപകനുമായിരുന്ന നടരാജഗുരുവിന്റെ 53-ാമത് സമാധിവാർഷികദിനത്തിൽ നടരാജഗിരിയിലെ സമാധി പീഠത്തിലെത്തി പുഷ്പാർച്ചന നടത്തിയശേഷം സംസാരിക്കുകയായിരുന്നു സ്വാമി ശുഭാംഗാനന്ദ. ഗുരുവിന്റെ ഏകലോക സിദ്ധാന്തത്തെക്കുറിച്ച് പ്രതിപാദിക്കുന്ന നടരാജഗുരുവിന്റെ പ്രൗഢങ്ങളായ ഗ്രന്ഥങ്ങൾ സമൂഹത്തിൽ ചർച്ച ചെയ്യേണ്ടതാണെന്നും സ്വാമി പറഞ്ഞു.