പാതിവില തട്ടിപ്പ് കേസ്: ഇ.ഡി ആവശ്യപ്പെട്ട രേഖകള്‍ പൊലീസ് കൊടുക്കുന്നില്ലെന്ന് കേന്ദ്രമന്ത്രി
തിരുവനന്തപുരം∙ പാതിവില തട്ടിപ്പ് കേസില്‍ ഇ.ഡി ആവശ്യപ്പെട്ട രേഖകള്‍ കൈമാറാന്‍ പൊലീസ് തയാറാകുന്നില്ലെന്ന് കേന്ദ്രധന സഹമന്ത്രി പങ്കജ് ചൗധരി. എഫ്‌ഐആറിന്റെ പകര്‍പ്പും കേസന്വേഷണത്തിന്റെ വിവരങ്ങളുമാണ് ആവശ്യപ്പെട്ടത്. എന്നാല്‍ ഒരു വിവരവും നല്‍കാന്‍ പൊലീസ് തയാറാകുന്നില്ലെന്ന് ലോക്സഭയിൽ എന്‍.കെ. പ്രേമചന്ദ്രന്റെ ചോദ്യത്തിനു മറുപടിയായി മന്ത്രി പറഞ്ഞു. കള്ളപ്പണം വെളുപ്പിക്കല്‍ തടയല്‍ നിയമപ്രകാരം പന്ത്രണ്ടിടത്ത് ഇ.ഡി പരിശോധന നടത്തിയെന്നും ഇടത്തരക്കാരാണ് കൂടുതല്‍ തട്ടിപ്പിന് ഇരയായതെന്നും മന്ത്രി അറിയിച്ചു. തട്ടിപ്പ് സംബന്ധിച്ച് അന്വേഷണം സിബിഐയെ ഏല്‍പ്പിക്കുന്നതു പരിഗണനയിലില്ലെന്നും മന്ത്രി വ്യക്തമാക്കി.അതേസമയം, കേസില്‍ പ്രതിയായ സത്യസായി ട്രസ്റ്റ് എക്സിക്യൂട്ടീവ് ഡയറക്ടര്‍ കെ.എന്‍. ആനന്ദ കുമാറിന്റെ മുന്‍കൂര്‍ ജാമ്യ ഹര്‍ജിയില്‍ തിരുവനന്തപുരം പ്രിന്‍സിപ്പള്‍ സെഷന്‍സ് കോടതി ചൊവ്വാഴ്ച വിധി പറയും.
Source link
