തൃശൂരിൽ ട്രെയിൻ അട്ടിമറിക്കാൻ ശ്രമം; പാളത്തിൽ ഇരുമ്പ് തൂൺ കയറ്റിവച്ചു

തൃശൂർ: തൃശൂരിൽ ട്രെയിൻ അട്ടിമറിക്കാൻ ശ്രമമെന്ന് വിവരം. റെയിൽവേ ട്രാക്കിൽ ഇരുമ്പ് തൂൺ കയറ്റിവച്ചാണ് ട്രെയിൻ അട്ടിമറിക്കാൻ ശ്രമം നടത്തിയത്. തൃശൂർ റെയിൽവേ സ്റ്റേഷൽ നിന്ന് 100 മീറ്റർ മാത്രം അകലത്തിലുള്ള ട്രാക്കിലാണ് ഇരുമ്പ് തൂൺ കണ്ടെത്തിയത്. ഇന്ന് പുലർച്ചെ 4.55നായിരുന്നു സംഭവം നടന്നത്.

ഇതുവഴി കടന്നുപോയ ചരക്ക് ട്രെയിൻ ഇരുമ്പ് തൂൺ തട്ടിത്തെറിപ്പിച്ചു. തൃശൂർ എറണാകുളം ഡൗൺലൈൻ പാതയിലാണ് ഇരുമ്പ് തൂൺ കണ്ടത്. സംഭവത്തിൽ ആർപിഎഫ് ഇന്റലിജൻസ് സ്ഥലത്തെത്തി പരിശോധന തുടങ്ങി. ഗുഡ്സ് ട്രെയിനിന്റെ ലോക്കോ പെെലറ്റാണ് സംഭവം റെയിൽവേ സ്റ്റേഷനിൽ വിളിച്ചുപറഞ്ഞത്.

സംഭവത്തിൽ തമിഴ്‌നാട് സ്വദേശി ഹരി (38) പൊലീസ് പിടിയിലായി. പ്രതി ലഹരിക്ക് അടിമയാണെന്ന് പൊലീസ് പറയുന്നു. റെയിൽ റോഡ് മോഷ്ടിക്കാൻ നടത്തിയ ശ്രമത്തിനിടെയാണ് സംഭവമെന്നാണ് വിവരം. റെയിൽ റോഡ് ട്രാക്കിലിട്ട് മുറിക്കാനാണ് പ്രതി ശ്രമിച്ചതെന്നും പൊലീസ് പറഞ്ഞു.